ក្នុងស្មារតីខ្មែរជួយខ្មែរ ប្រកបដោយទឹកចិត្តស្មោះសររបស់សប្បុរសជន នាថ្ងៃទី១៦ ខែសីហា ឆ្នាំ ២០២៥ ឯកឧត្តម ប្រាក់ សោភ័ណ អភិបាលខេត្តសៀមរាប បានទទួលអំណោយពី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជូនដល់សមរភូមិមុខ គ្រួសារទ័ព និងប្រជាជនដែលបានជម្លៀសពីតំបន់សមរភូមិចូលមកភូមិសាស្ត្រខេត្តសៀមរាប អំណោយដែលទទួលបានរួមមាន ធុងចម្រោះទឹកស្អាត ៥០០ធុង មី ៥៥៥កេស អង្ករ ៤៣៥០គីឡូ មីកំប៉ុង ១០កេស មីធីតាមី មីកងបី៥០កេស នំកញ្ចប់ ១០០កេស ស្ករគ្រាប់ ១០០កេស ត្រីខ ៥កេស ប្រេងកូឡា ២កេសកន្លះ ប្រេងរឹត ៩៦ប្រអប់ ធូបមូស ១កេស ថ្នាំបាញ់ដេញមូស ២០ដប សៀង ៥០០ដប ទឹកត្រី ១០០យួរ ទឹកស៊ីអ៉ីវ ១០៦យួរ ទឹកសុទ្ធ ១០០កេស តែ ១កេស ម្សៅធម្មជាតិ ១កេស កនកសែងពោះគោ ១០០០កន្សែង សាប៊ូកក់សក់ដប ៥កេស សាប៊ូដុសខ្លួនដប ៥កេស ក្រមា ១០០ ម៉ាសN95 និង ម៉ាសក្រម៉ា ២០២០ម៉ាស អាវដៃខ្លី ២១៩អាវ ខោខ្លី ៤០ខោ។

ក្នុងនាមរដ្ឋបាលខេត្ត ឯកឧត្តម ប្រាក់ សោភ័ណ បានសម្ដែងនូវសេចក្តីរំភើប និងការកោតសរសើរដល់ទឹកចិត្តរបស់ប្រជាពលរដ្ឋក្នុងស្មារតីខ្មែរជួយខ្មែរ ប្រកបដោយទឹកចិត្តស្មោះសររបស់ថ្នាក់ដឹកនាំ និងមន្ត្រីរាជការនៃក្រសួងឧស្សាហកម្មទាំងអស់ ដែលបានចែករំលែកនូវក្តីស្រឡាញ់ សាមគ្គីភាព មិត្តភាព និងការបរិច្ចាគស្បៀងអាហារជូនដល់សមរភូមិជួរមុខ គ្រួសារទ័ព និងជនភៀសសឹកដែលកំពុងស្នាក់នៅក្នុងខេត្តសៀមរាប ដោយទឹកចិត្តស្មោះសរក្នុងការរួបរួមជាតិខ្មែរជាធ្លុងមួយដោយស្មារតីខ្មែរជួយខ្មែរក្នុងគ្រាលំបាក។

ឯកឧត្តម ប្រាក់ សោភ័ណ ក៏បានអំពាវនាវដល់ ឯកឧត្តម លោកជំទាវ អ្នកឧកញ៉ា លោកលោកស្រី ម្ចាស់ក្រុមហ៊ុន សហគ្រាស ពាណិជ្ជករ អាជីវករ និងបងប្អូនប្រជាពលរដ្ឋដែលនៅតាមបណ្តាក្រុងស្រុក សូមបន្តចូលរួមបន្តឧបត្ថម្ភគាំទ្រនូវគ្រឿងឧបភោគបរិភោគ និងសម្ភារប្រើប្រាស់បន្ថែមទៀត នៅតាមបណ្តាក្រុងស្រុកបងប្អូនផ្ទាល់ ឬតាមរយៈរដ្ឋបាលខេត្តសៀមរាប ក្នុងន័យរួមតែមួយ គឺខ្មែរជួយខ្មែរក្នុងគ្រាលំបាក។

ឯកឧត្តមរដ្ឋមន្ត្រី ហែម វណ្ណឌី ដោយមើលឃើញពីបញ្ហា និងទុក្ខលំបាករបស់បងប្អូនជនភៀសសឹក ថ្នាក់ដឹកនាំ និងមន្ត្រីរាជការនៃក្រសួងឧស្សាហកម្មទាំងអស់ ក៏បានរួមគ្នាបរិច្ចាគនូវធនធាន ប្រមូលយកមកប្រគល់ជូនដល់រដ្ឋបាលខេត្តសៀមរាប ដើម្បីយកទៅចែកជូនបន្តបងប្អូនភៀសសឹកដែលមកស្នាក់នៅទីសុវត្ថិភាព និងសំដៅធ្វើយ៉ាងណាឱ្យជីវភាពប្រចាំថ្ងៃមានហូបចុកគ្រប់ៗគ្នា។ ពេលនេះយើងទាំងអស់គ្នាសុទ្ធតែជួបនូវសេចក្តីទុក្ខលំបាក ដោយសារសង្គ្រាមបរទេសឈ្លានពាន ហេតុនេះយើងត្រូវចេះចែករំលែក សង្គ្រោះ និងជួយគ្នាទៅវិញទៅមក។ ស្ថិតនៅក្នុងកាលៈទេសៈណាក៏ដោយ ប្រជាពលរដ្ឋខ្មែរទាំងអស់ត្រូវចាំថា គ្មានអ្វីដែលល្អប្រសើរជាងពេលដែលប្រទេសជាតិយើងមានសន្តិភាពនោះទេ៕