ប្រជាពលរដ្ឋជិត៨០០នាក់ ត្រូវបានជម្លៀសខ្លួនចូលមកកាន់ខេត្តសៀមរាប ដោយទទួលបានការយកចិត្តទុកដាក់ពីអាជ្ញាធរពាក់ព័ន្ធ

ខេត្តសៀមរាប៖គិតត្រឹមម៉ោង១១ព្រឹក ថ្ងៃទី២៥ ខែកក្កដា ឆ្នាំ២០២៥នេះ ប្រជាពលរដ្ឋជិត៨០០ហើយ បានជម្លៀសចូលកាន់ខេត្តសៀមរាប ក្រោយពេលអាជ្ញាធរខេត្តប្រកាសអំពីការត្រៀមទទួលបងប្អូនប្រជាពលរដ្ឋដែលជម្លៀសចេញពីតំបន់ព្រំដែនដែលមានការឈ្លានពានពីប្រទេសថៃ ចូលមកកាន់ខេត្តសៀមរាប ដោយទទួលបានការយកចិត្តទុកដាក់ពីអាជ្ញាធរពាក់ព័ន្ធ។

នាយករដ្ឋបាលសាលាខេត្តសៀមរាប និងជាអ្នកនាំពាក្យរដ្ឋបាលខេត្ត លោក លី វណ្ណៈ
បានឱ្យដឹងថា អនុវត្តតាមការណែនាំ ឯកឧត្តម ប្រាក់ សោភ័ណ អភិបាលខេត្តសៀមរាប ខេត្តបានរៀបចំនៅតាមបណ្តាស្រុកចំនួន៣មាន៖ ស្រុកក្រឡាញ់ ស្រីស្នំ និងស្រុកស្វាយលើ ដោយកំណត់យកទីតាំងវត្តអារាម ឬទីកន្លែងមានសុវត្ថិភាពផ្សេងៗ សម្រាប់ត្រៀមទទួលបងប្អូនប្រជាពលរដ្ឋជម្លៀសខ្លួនពីទីតាំងសឹកសង្គ្រាមមកស្នាក់នៅបណ្ដោះអាសន្ន។

លោក លី វណ្ណៈ បញ្ជាក់ថា គិតមកដល់ពេលនេះ បងប្អូនប្រជាពលរដ្ឋប្រមាណជិត៨០០នាក់ហើយ បានចូលមកកាន់ខេត្តសៀមរាប។ ជាមួយគ្នានេះ អាជ្ញាធរខេត្តគ្រោងពង្រីកទីតាំង នៅតាមបណ្តាស្រុកមួយចំនួនបន្ថែមទៀត ។