ភ្នំពេញ}ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម នៃរដ្ឋសភា (គណៈកម្មការទី៣) បានអញ្ជើញដឹកនាំកិច្ចប្រជុំផ្ទៃក្នុងគណៈកម្មការ ដើម្បីពិនិត្យសិក្សាសេចក្ដីព្រាងច្បាប់ជលផល និងពិភាក្សាការងារសម្រាប់ត្រៀមចុះបំពេញបេសកកម្មនៅខេត្តមណ្ឌលគីរី រតនគីរី និងខេត្តស្ទឹងត្រែង។

កិច្ចប្រជុំ នៅព្រឹកថ្ងៃទី១៨ ខែកុម្ភៈ ឆ្នាំ២០២៥ នៅវិមានរដ្ឋសភានេះ បានធ្វើការពិនិត្យពិភាក្សាទៅលើ សេចក្តីព្រាងច្បាប់ជលផល និងជជែកពិភាក្សា ពីសេចក្តីសម្រេចស្តីពីបែបបទ នីតិវិធី និងវិធាននៃការតាំងសំណួរ ចម្លើយនិងការបំភ្លឺនៅរដ្ឋសភា សេចក្តីសម្រេចស្តីពីបែបបទការងាររបស់គណៈកម្មការនានានៃរដ្ឋសភា សេចក្តីសម្រេចស្តីពី បែបបទនិងនីតិវិធីនៃការចុះបំពេញបេសកកម្មរបស់គណៈកម្មការនានានៃរដ្ឋ សភា។

សូមបញ្ជាក់ថា សេចក្តីព្រាងច្បាប់ជលផល ត្រូវបានកិច្ចប្រជុំគណ:កម្មាធិការអចិន្ត្រៃយ៍រដ្ឋសភាពិភាក្សា កាលពីថ្ងៃទី១៣ ខែកុម្ភៈ ឆ្នាំ២០២៥ហើយសម្រេចប្រគល់ជូនគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក និងឧតុនិយម នៃរដ្ឋសភា ដើម្បីពិនិត្យសិក្សា រួចធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ។

គួររំលឹកថាសេចក្តីព្រាងច្បាប់ខាងលើនេះ ត្រូវបានគណៈរដ្ឋមន្ត្រីសម្រេចយល់ព្រមក្នុងសម័យប្រជុំពេញអង្គគណៈរដ្ឋមន្ត្រីកាលពីថ្ងៃទី៦ ខែធ្នូ ឆ្នាំ២០២៤ ដើម្បីបញ្ជូនមកសុំការពិនិត្យ និងអនុម័តពីស្ថាប័ននីតិប្បញ្ញត្តិ៕