កណ្តាល៖ ឯកឧត្តម គង់ សោភ័ណ្ឌ អភិបាលខេត្តនិងជាប្រធានគណៈកម្មាធិការសាខាកាកបាទក្រហមកម្ពុជាខេត្តកណ្ដាល និងលោកជំទាវ ព្រមទាំងមន្ត្រីរាជការ មន្ទីរជុំវិញខេត្ត សមាជិក សមាជិកា សាខាកាកបាទក្រហមកម្ពុជាខេត្តកណ្តាល កាលពីរសៀលថ្ងៃទី១៣ ខែកក្កដា ឆ្នាំ២០២២នេះ បាននាំយកនូវទៀនវស្សា ទេយ្យវត្ថុ គ្រឿងឧបភោគបរិភោគ និងបច្ច័យកសាងមួយចំនួន ដែលជាអំណោយរបស់សាខាកាកបាទក្រហមកម្ពុជាខេត្តកណ្តាល មកប្រគេនដល់ព្រះសង្ឃដែលនឹងគង់ចាំព្រះវស្សា នៅវត្តប្រជុំនទី ហៅក្រពើហា ស្ថិតនៅភូមិក្រពើហា សង្កាត់ព្រែកឬស្សី ក្រុងតាខ្មៅ។បន្ទាប់ពីបូជាទៀន ធូប ផ្កាភ្ញី ចំពោះព្រះពុទ្ធរូប និងធ្វើពិធីតាមទំនៀមទម្លាប់តាមប្រពៃណីព្រះពុទ្ធសាសនា រួចមក ថ្លែងទៅកាន់ពុទ្ធបរិស័ទ និងប្រជាពលរដ្ឋនាឱកាសនោះ ឯកឧត្តម គង់ សោភ័ណ្ឌ បាននាំនូវប្រសាសន៍ផ្ដាំផ្ញើ និងសួរសុខទុក្ខ ព្រមទាំងក្ដីនឹករលឹក ពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្ដេចតែងតែគិតគូសុខទុក្ខ និងតែងព្រួយបារម្ភជានិច្ច ចំពោះប្រជាពលរដ្ឋគ្រប់រូបខាងផ្នែកអាណាចក្រ ក៏ដូចជាព្រះសង្ឃគ្រប់អង្គខាងផ្នែកពុទ្ធចក្រផងដែរ។ឯកឧត្តមបានមានប្រសាសន៍ថា បុណ្យចូលព្រះវស្សាគឺ ជាបុណ្យដែលមានមកតាមផ្លូវព្រះពុទ្ធសាសនា ដែលព្រះសង្ឃត្រូវចូលវស្សាតាមពុទ្ធានុញ្ញាត រយៈពេល៣ខែជារៀងរាល់ឆ្នាំ ហើយក្នុងអំឡុងពេលចូលវស្សាព្រះសង្ឃគឺពុំអាចនិមន្ត ចេញពីវត្ត និងបិណ្ឌបាតដូចធម្មតាបានឡើយ ព្រោះជារដូវដែលមានភ្លៀងធ្លាក់ជោគជាំខ្លាំង ហើយក៏ជាពេលវេលាមួយសម្រាប់ព្រះសង្ឃត្រូវសិក្សារៀនសូត្រធម៌វិន័យ ដូច្នេះពុទ្ធបរិស័ទមានតួនាទីសំខាន់ណាស់ក្នុងការទំនប់បម្រុងចង្ហាន់ សម្ភារៈប្រើប្រាស់ ស្បង់ជីវរ និងភេសជ្ជៈជាដើមសម្រាប់ប្រគេនព្រះសង្ឃតាមសទ្ធាជ្រះថ្លារៀងៗខ្លួន។ឯកឧត្តមបានបញ្ជាក់ថា សាសនាបានរួមចំណែក និងដើរតួនាទីដ៏មានសារ:សំខាន់ ជាមួយនឹងរាជរដ្ឋាភិបាល ក្នុងការអភិវឌ្ឍរវាងវិស័យអាណាចក្រ និងពុទ្ធចក្រ ក្រោមម្លប់នៃសុខសន្តិភាព ស្ថិរភាពនយោបាយ សន្តិសុខសណ្ដាប់ធ្នាប់សង្គម និងការអភិវឌ្ឍ ជាក់ស្តែងការប្រារព្ធពិធីនាពេលនេះបាន គឺដោយសារប្រទេសជាតិមានសុខសន្តិភាព ក្រោមការដឹកនាំ ប្រកបដោយគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានធ្វើឱ្យប្រទេសជាតិ មានសុខសន្តិភាពពេញលេញ មានស្ថិរភាពនយោបាយ និងមានការអភិវឌ្ឍន៍ទាំងផ្នែកអណាចក្រ និងផ្នែកពុទ្ធចក្រ គ្រប់ទីកន្លែងទូទាំងប្រទេសកម្ពុជា មានតែសន្តិភាពទេ ទើបធ្វើឱ្យព្រះពុទ្ធសាសនា មានការរីកចម្រើនលូតលាស់ និងធានាបាននូវអរិយធម៌ និងវប្បធម៌រុងរឿងគង់វង្សស្ថិតស្ថេរជានិច្ចនិរន្តរ៍។សូមបញ្ជាក់ថា ទេយ្យទានដែលបានប្រគេនរួមមាន៖ អង្ករចំនួន ២តោន មី២០កេស ត្រីខកំប៉ុង៥០យួរ ទឹកសុទ្ធ ២០កេស ទឹកត្រី១០យួរ ទឹកស៉ីអ៉ីវ ១០យួរ ម៉ាស ១កេស ជែលលាងដៃ ២០កេស និងបច្ច័យមួយចំនួនផងដែរ៕
ព័ត៌មានគួរចាប់អារម្មណ៍
កសិករនាំគ្នាសម្រុកដកមើមដំឡូងមី ខណ:តម្លៃទីផ្សារស្ទុះហក់ឡើងខ្ពស់ជាងឆ្នាំមុនៗ (សម្លេងខ្មែរពិត)
សម្តេចក្រឡាហោម ស ខេង អញ្ជីញជាគណៈអធិបតី ក្នុងពិធី សន្និបាតបូកសរុបការងារបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ នៅទូទាំងប្រទេស (សម្លេងខ្មែរពិត)
ក្រុងកំពតនឹងត្រូវបានចុះបញ្ជីជាក្រុងបេតិកភណ្ឌពិភពលោកនាពេលខាងមុខនេះ (សម្លេងខ្មែរពិត)
ពិធីសំណេះសំណាលសិស្សជ័យលាភីប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០១៧-២០១៨ នៅខេត្តកំពត (សម្លេងខ្មែរពិត)
ក្រសួងកសិកម្ម រុក្ខាប្រមាញ់ និងនេសាទ បើកវគ្គបណ្តុះបណ្តាល ស្តីពីការគ្រប់គ្រង និងភាពជាអ្នកដឹកនាំ (សម្លេងខ្មែរពិត)
វីដែអូ