ដោយស្ថានភាពការរីករាលដាលជំងឺកូវីតហាក់មិនទាន់ថមថយ ហក់កើនឡើងគួរអោយព្រួយបារម្មណ៍ និងដើម្បីចូលរួមជាមួយរាជរដ្ឋាភិបាល និងចូលរួមជាមួយវិធានការណ៍សុខាភិបាល នាថ្ងៃទិវារំលឹកអនុស្សាវរីយ៍ ដាំកូនឈើ ៩ កក្កដា ២០២១ នេះ សមាគមរាជសីហ៍សូមអនុញ្ញាតភ្ជាប់ជូននូវកម្រងរូបភាពកន្លងផុតទៅ នៃសកម្មភាពដាំកូនឈើជាមួយថ្នាក់ដឹកនាំកងយោធពលខេមរភូមិន្ទ ឯកឧត្តមមេបញ្ជាការ ឯកឧត្តមមេបញ្ជាការរង បងប្អូនកងយោធពលខេមរភូមិន្ទ ដែលសកម្មភាពទាំងនេះបានបង្ហាញអំពីការរួបរួមសាមគ្គីនៃចំណងមិត្តភាពដ៏ល្អរវាងសមាគមរាជសីហ៍ និងកងយោធពលខេមរភូមិន្ទលើកិច្ចការសង្គមរួបរួមដាំកូនឈើមួយជីវិតមួយ តាមទីបញ្ជាការដ្ឋាន សាលានាទាហានសកម្ម កងពលធំ កងពលតូច វរសេនាធំ វរសេនាតូច អនុសេនាធំ អនុសេនាតូច វរការពារព្រំដែន។ល។ ដែលសកម្មភាពទាំងនេះជាកិច្ចប្រឹងប្រែងរួមគ្នា ដើម្បីផ្តល់នូវធម្មជាតិព៍ណបៃតង ការពារខ្យល់បក់ខ្លាំង បន្សុទ្ធបរិយាកាស ទាក់ទាញទឹកភ្លៀង និងទុកជាមរតកដល់កូនចៅជំនាន់ក្រោយ នៅតាមទីតាំងខាងលើ។

ទោះសកម្មភាពទាំងនោះបានកន្លងផុតទៅយ៉ាងណាក្តី ក៏អនុស្សាវរីយ៍ដែលថ្នាក់ដឹកនាំ សមាជិកសមាគមរាជសីហ៍បានបង្កើតរួមគ្នាជាមួយ ថ្នាក់ដឹកនាំ និងបងប្អូនកងកំលាំងយោធពលខេមរភូមិន្ទហាក់នៅថ្មីៗ នៅតែដក់ជាប់ក្នុងដួងចិត្តរបស់យើងទាំងអស់គ្នាដោយមិនអាចបំភ្លេចបាន ។

ទោះយ៉ាងណា យើងនៅតែបន្តកិច្ចការមនុស្សធម៌ និងសប្បុរសធម៌ជាមួយគ្នា គាំទ្រ និងចូលរួមជាមួយរាជរដ្ឋាភិបាល ទោះស្ថិតក្នុងកាលៈទេសៈ ឬគ្រាលំបាក គ្រោះទឹកជំនន់ ការរីករាលដាលកូវីត១៩ ដើម្បីកិច្ចវឌ្ឍនភាពនាវាកម្ពុជារបស់យើង។

តាំងនាមអោយ ប្រធាន អនុប្រធាន សមាជិក សមាជិកា យុវជនសមាគមរាជសីហ៍រាជធានី-ខេត្ត យើងខ្ញុំសូមជូនពរអោយប្រទេសកម្ពុជាឆាប់បានវិលត្រឡប់ទៅរកស្ថានភាពល្អប្រសើរដូចដើមតាមការដឹកនាំដ៏ឈ្លាសវៃរបស់ប្រមុខរដ្ឋាភិបាល ដើម្បីសម្បូរសប្បាយ រុងរឿងរបស់ព្រះរាជាណាចក្រកម្ពុជានៃយើង ព្រមទាំងជូនពរបងប្អូនកងកំលាំងប្រដាប់អាវុធ កងយោធពលខេមរភូមិន្ទ អជ្ញាធរមានសមត្ថកិច្ច ពុកម៉ែ ពូមីង តាយាយ កូនក្មួយទាំងអស់ សូមជួបតែសេចក្តីសុខចម្រើន និងបរវៀសជៀសឆ្ងាយពីកូវីត១៩គ្រប់ៗគ្នា។