កណ្ដាល៖ ឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្ដាល អមដំណើរដោយលោកឧត្តមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្តាល នៅរសៀលថ្ងៃសុក្រទី៣០ ខែកក្កដា ឆ្នាំ២០២១នេះ បានចុះជួបសំណេះសំណាល សួរសុខទុក្ខ និងនាំយកអំណោយជូនបងប្អូន ពូមីង ជាអាជីវករនៅផ្សារតាខ្មៅចំនួន២២តូប ដែលរងគ្រោះដោយអគ្គីភ័យ កាលពីថ្ងៃទី១០ ខែឧសភា ឆ្នាំ២០២១ កន្លងទៅ ស្ថិតនៅបរិវេណបណ្តោយមាត់ស្ទឹងព្រែកត្នោត មុខផ្សារតាខ្មៅចាស់។ នាឱកាសនេះដែរ ឯកឧត្តមអភិបាលខេត្ត បានសម្ដែងការចូលរួមសោកស្តាយ ចំពោះឧបទ្ទវហេតុដែលកើតឡើងចំពោះបងប្អូនអាជីវករទាំងអស់គ្នា ដោយបណ្តាលឱ្យបងប្អូនទទួលរងគ្រោះធ្វើឲ្យខូចខាតទ្រព្យសម្បត្តិមួយចំនួន។ ទន្ទឹមគ្នានោះដែរ ឯកឧត្តម គង់ សោភ័ណ្ឌ បានបញ្ជាក់ថា ដើម្បីជៀសវាងហេតុការដ៏អាក្រក់នេះកើតឡើងជាថ្មីទៀត ឯកឧត្ដមសូមអំពាវនាវដល់បងប្អូនបង្កើនការយកចិត្តទុកដាក់ប្រុងប្រយ័ត្នខ្ពស់ចំពោះការប្រើប្រាស់ភ្លើងធូប ភ្លើងអគ្គីសនីផ្សេងៗ ហើយជាងនេះទៅទៀតនោះក៏សូមបន្តចូលរួមថែរក្សាការពារខ្លួនពីការឆ្លងជំងឺកូវីដ-១៩ ផងដែរ ត្រូវគោរពនិងអនុវត្តឱ្យបានខ្ជាប់ខ្ជួននូវវិធានការ ៣.កុំ ៣.ការពារ ដែលជាយន្តដ៏ស័ក្តិសិទ្ធិបំផុតរបស់ សម្តេចតេជោ នាយករដ្ឋមន្រ្តី ដើម្បីរួចផុតពីការយារយីពីមេរោគដ៏សាហាវនេះ ជាពិសេសមេរោគបំប្លែងថ្មីប្រភេទដែលតា (Delta) នេះតែម្តង។ ជាមួយគ្នានេះដែរ ឯកឧត្តម គង់ សោភ័ណ្ឌ អភិបាលខេត្តកណ្តាលបាននាំយកអំណោយប្រគល់ជូនដល់បងប្អូនអាជីវករទាំង២២តូប គឺក្នុង០១តូប ទទួលបានអង្ករ ២៥គ.ក មី០២កេស ត្រីខកំប៉ុង០១យួរ ទឹកត្រី០១យួរ ម៉ាស់០១ប្រអប់ ជែល០១ដប និងថវិកា ៤០០,០០០រៀល៕