កណ្តាល៖កម្លាំងនគរបាលនៃអធិការដ្ឋាននគរបាលក្រុងតាខ្មៅ នឹងចាប់ផ្តើមធ្វើការត្រួតពិនិត្យនិងណែនាំលើការពាក់ម៉ាស់របស់ប្រជាពលរដ្ឋ ទាំងអ្នកដំណើរថ្មើរជើង ជិះកង់ ជិះម៉ូតូ ជិះម៉ូតូកង់បី ជាដើម ដើម្បីចូលរួមនិងទប់ស្កាត់ការឆ្លងរាលដាលនៃជំងឺកូវីដ១៩ ។

សកម្មភាពទាំងអស់នេះ គឺ យោងតាមបទបញ្ជាដ៏ម៉ឺងម៉ាត់ពីលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល និង ទទួលអនុវត្តផ្ទាល់ពីលោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ ។

ជាក់ស្ដែង នៅថ្ងៃទី៣០ ខែកក្កដា ឆ្នាំ២០២១ នេះ កម្លាំងផ្នែកសណ្ដាប់ធ្នាប់ចរាចរណ៍នៃអធិការដ្ឋាននគរបាលក្រុងតាខ្មៅ ក៏បានចាប់ផ្តើមធ្វើការចែកម៉ាស់ដល់បងប្អូនប្រជាពលរដ្ឋនិងមានការណែនាំបន្ថែម អំពីអត្ថប្រយោជន៍នៃការពាក់ម៉ាស់ នេះ ។

នៅក្នុងករណីដែលធ្វើការណែនាំហើយ ប្រជាពលរដ្ឋ នៅតែមិនអនុវត្តនោះ សមត្ថកិច្ចនឹងធ្វើការផាកពិន័យតាមច្បាប់កំណត់ ។

សូមបញ្ជាក់ថា រដ្ឋបាលខេត្តកណ្តាល បានដាក់ចេញនូវវិធានការរដ្ឋបាលសម្រាប់រយៈពេល១៤ថ្ងៃ គិតចាប់ពីម៉ោង២៣៖៥៩នាទី នាថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១ ដើម្បីប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ១៩ នៅក្នុងភូមិសាស្ត្រខេត្តកណ្តាល ។

នេះបើយោងតាមសេចក្ដីសម្រេចរបស់ លោក គង់ សោភ័ណ្ឌ អភិបាលខេត្តកណ្តាល កាលពីថ្ងៃទី២៩ ខែកក្កដា ឆ្នាំ២០២១ ។

ប្រការ២នៃសេចក្ដីសម្រេចនេះ ក៏បានចែងដែរថា ក្នុងអំឡុងពេលនៃការដាក់ចេញវិធានការរដ្ឋបាល ត្រូវបានផ្អាកជាបណ្ដោះអាសន្នចំពោះសកម្មភាព មុខរបរ ឬ អាជីវកម្ម ដែលមានហានិភ័យខ្ពស់នៃការឆ្លងរាលដាល ជំងឺកូវីដ១៩ ដូចខាងក្រោម ៖

-អាជីវកម្មក្លិបកម្សាន្តគ្រប់ប្រភេទ ជាអាទិ៍ ខារ៉ាអូខេ រង្គសាល ឌីស្កូតែក បៀរហ្គាឌិននិងកាស៊ីណូ
-រមណីយដ្ឋាន សារមន្ទីរ សួនកុមារនិងសួនកម្សាន្តនានា
-អាជីវកម្មម៉ាស្សា សូណានិងស្ទីមគ្រប់ប្រភេទ
-ហាងលក់និងសេពគ្រឿងស្រវឹងគ្រប់ប្រភេទ
-រោងភាពយន្ត រោងសម្ដែងសិល្បៈ
-ក្លិបហាត់ប្រាណនិងមជ្ឈមណ្ឌលកីឡាគ្រប់ប្រភេទ

ក្រៅពីសកម្មភាពការងារនិងមុខរបរឬអាជីវកម្មដែលត្រូវបានផ្អាកជាបណ្ដោះអាសន្ន ដោយបានកំណត់ខាងលើ , រដ្ឋបាលខេត្តកណ្តាល នឹងពិនិត្យសម្រេចផ្អាកសកម្មភាពការងារមុខរបរឬអាជីវកម្មផ្សេងទៀតទៅតាមស្ថានភាពវិវឌ្ឍន៍ជាក់ស្តែងដែលអនុលោមតាម ការចាំបាច់ក្នុងការប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ១៩ ៕