កណ្ដាល៖ លោក គង់ សោភ័ណ្ឌ អភិបាលនៃគណៈអភិបាលខេត្តកណ្តាល នៅព្រឹកថ្ងៃទី២៩ ខែឧសភា ឆ្នាំ២០២១នេះ បានទទួលអំណោយពីលោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ និងជាអនុប្រធានក្រុមការងាររាជរដ្ឋា ភិបាលចុះមូលដ្ឋានខេត្តកណ្តាលសម្រាប់ប្រើប្រាស់ក្នុងការងារគ្រប់គ្រង បង្ការ ទប់ស្កាត់ជំងឺកូវីដ-១៩នៅមូលដ្ឋានខេត្តកណ្ដាល។

ក្នុងឱកាសនោះ លោក គង់ សោភ័ណ្ឌ អភិបាលខេត្តកណ្តាលបានគោរពថ្លែងអំណរគុណយ៉ាងជ្រាលជ្រៅបំផុតចំពោះវត្តមានដ៏ខ្ពង់ខ្ពស់របស់ លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ និងជាអនុប្រធានក្រុមការងាររាជរដ្ឋា ភិបាលចុះមូលដ្ឋានខេត្តកណ្តាល ដែលបានអញ្ជើញផ្ដល់កិត្តិយសដ៏ខ្ពង់ខ្ពស់នាំយកអំណោយយ៉ាងច្រើនសន្ធឹកសន្ធាប់សម្រាប់ប្រើប្រាស់ក្នុងការងារគ្រប់គ្រង បង្ការ ទប់ស្កាត់ជំងឺកូវីដ-១៩ ជូនដល់រដ្ឋបាលខេត្តកណ្តាល និងមន្ទីរពេទ្យបង្អែកជ័យជំនះ ដោយរួមមាន៖នូវអាវពេទ្យចំនួន ១៦០០ឈុត និងម៉ាស ១២៤,០០០ម៉ាស ក្នុងនោះជូន រដ្ឋបាលខេត្តចំនួន១,០០០ឈុត និងម៉ាស ១០០,០០០ម៉ាស​ និងមន្ទីរពេទ្យបង្អែកជ័យជំនះចំនួន៦០០ឈុត និងម៉ាសចំនួន ២៤,០០០ម៉ាស។

លោកអភិបាលខេត្តបានថ្លែងទៀតថា ទឹកចិត្តប្រកបដោយសប្បុរសធម៌ និងគុណធម៌ របស់ លោក លោកស្រី នឹងត្រូវបានចងចាំទុកដោយរដ្ឋបាលខេត្ត និងប្រជាពលរដ្ឋនៅទូទាំងខេត្ត។

ជាមួយគ្នានោះដែរ លោក គង់ សោភ័ណ្ឌ អភិបាលខេត្តក៏បានបួងសួងដល់វត្ថុស័ក្តិសិទ្ធិក្នុងលោក សូមជួយអភិបាល ប្រោសព្រំ ប្រសិទ្ធពរជ័យជូនលោកឧបនាយករដ្ឋមន្រ្តី និង លោកស្រី ព្រមទាំងសហការី សូមជួបប្រទះនូវពុទ្ធពរ៤ប្រការ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ និងសូមទទួលបានជោគជ័យគ្រប់ភារកិច្ច៕ដោយ:ម៉ៃទី