កណ្តាល៖នៅព្រលប់ថ្ងៃទី១៩ ខែមេសា ឆ្នាំ២០២១ អាជ្ញាធរខេត្តកណ្ដាល បានសម្រេចហ៊ុំព័ទ្ធផ្សារនៅទីលានបាល់ទាត់ក្រុងតាខ្មៅ ខេត្តកណ្តាល ដែលទើបបើកបានមួយថ្ងៃប៉ុណ្ណោះ ដើម្បីធ្វើតេស្តសំណាក ទៅលើក្រុមអាជីវករនិងអ្នកចូលផ្សារទាំងអស់ ក្រោយពីមន្ត្រីសុខាភិបាលរកឃើញមនុស្ស ចំនួន១១នាក់ មានកំដៅលើសពី៣៧អង្សាសេ សង្ស័យករណី កូវីដ១៩ ។

សមត្ថកិច្ច ថ្លែងប្រាប់ SKPថា មនុស្សចំនួន១១នាក់ ដែលខាងជំនាញមន្ត្រីសុខាភិបាល ពិនិត្យឃើញមានកំដៅ លើសពី៣៧ អង្សាសេ នោះ ត្រូវដឹកតាមរថយន្តយកទៅធ្វើចត្តាឡីស័កនៅព្រែកសំរោង ។

ដោយឡែក ផ្សារនេះ ត្រូវបានកម្លាំងគណៈបញ្ជាការឯកភាពខេត្តកណ្តាលនិងមន្ត្រីសុខាភិបាល ធ្វើការហ៊ុំព័ទ្ធដើម្បីយកសំណាកអ្នកដែលកំពុងលក់ដូរនៅក្នុងទីនោះនិងអ្នកដែលបានចូលទិញទំនិញ ក្នុងផ្សារ នេះ ដោយប្រុងប្រយ័ត្នបំផុតនិងទប់ស្កាត់មិនឲ្យអ្នកនៅក្នុងផ្សារចេញរហូតដល់ពិនិត្យរួចរាល់ ៕