បរទេស៖ ក្នុងរយៈពេល២៤ម៉ោងកន្លងមកនេះ ចំនួនអ្នកឆ្លងវីរុសកូរ៉ូណា ឬហៅកាត់ «កូវីដ-១៩» បានថយចុះមកនៅក្រោម២៧ម៉ឺននាក់ ហើយចំនួនអ្នកស្លាប់ក៏ថយចុះមក នៅក្រោម៧ពាន់នាក់។ នេះជាសញ្ញាវិជ្ជមានមួយ សម្រាប់មនុស្សជាតិ នៅលើពិភពលោក ប៉ុន្ដែទោះជាយ៉ាងណា មិនមែនមានន័យថា យើងត្រូវតែធ្វេសប្រហែសលើករណីវីរុសដ៏កំណាចនេះដែរ។
បើតាមគេហទំព័រ Worldometer បានចេញផ្សាយ កាលពីវេលាម៉ោង៨ និង៣០នាទីព្រឹក ថ្ងៃទី១៦ ខែកុម្ភៈ ឆ្នាំ២០២១ បានឲ្យដឹងថា ក្នុងរយៈពេល២៤ម៉ោងកន្លងមកនេះ មានករណីឆ្លងថ្មី នៃកូវីដ-១៩ នៅទូទាំងពិភពលោក សរុប ២៦២ ៤២៧នាក់ និងករណីស្លាប់ថ្មី សរុប ៦ ៥៦៦នាក់។

បើគិតចាប់តាំងពីការផ្ទុះឡើង នៃរោគរាតត្បាតកូវីដ-១៩ នៅទីក្រុងវូហាន ខេត្តហ៊ូប៉ី នាភាគកណ្ដាល ប្រទេសចិន កាលពីអំឡុងខែធ្នូ ឆ្នាំ២០១៩ រហូតមកដល់ព្រឹក ថ្ងៃទី១៦ ខែកុម្ភៈ ឆ្នាំ២០២១ នៅលើពិភពលោក មានអ្នកឆ្លងកូវីដ-១៩ សរុប ១០៩ ៦៦៩ ០៧០នាក់ ស្លាប់ ២ ៤១៨ ២០៤នាក់ និងអ្នកជំងឺ ចំនួន ២២ ៨៩៧ ៣២៥នាក់ កំពុងសម្រាកព្យាបាល ហើយក្នុងនោះមានអ្នកឈឺធ្ងន់ ៩៧ ៦៩៦នាក់។ ទោះជាយ៉ាងណា នៅលើពិភពលោក នៅតែមានសញ្ញាល្អ ដោយសារមានអ្នកព្យាបាលជាសះស្បើយ បន្ដកើនដល់ ៨៤ ៣៥៣ ៥៤១នាក់។

រហូតមកដល់ពេលនេះ សហរដ្ឋអាមេរិកនៅតែជាប្រទេសរងគ្រោះ ដោយសារកូវីដ-១៩ខ្លាំងជាងគេបំផុត នៅលើពិភពលោក។ ប្រទេសមហាអំណាចមួយនេះ មានអ្នកឆ្លងសរុបជាង ២៨ ៣១៧ ៦៨៩នាក់ (ករណីឆ្លងថ្មី ៥២ ៧៧១នាក់) ស្លាប់ ៤៩៨ ២០២នាក់ (ករណីស្លាប់ថ្មី ៩៥៣នាក់) អ្នកព្យាបាលជាសះស្បើយ ១៨ ៣៥៦ ៥៦២នាក់ និងអ្នកជំងឺ ចំនួន ៩ ៤៦២ ៩២៥នាក់កំពុងសម្រាកព្យាបាល ហើយក្នុងនោះមានអ្នកឈឺធ្ងន់ ១៨ ៩២៨នាក់។
ដោយឡែកប្រទេស ដែលមានអ្នកឆ្លងកូវីដច្រើនជាងគេ បន្ទាប់ពីអាមេរិក រួមមាន ឥណ្ឌា (ឆ្លងជិត១១លាននាក់), ប្រេស៊ីល (ឆ្លងជិត១០លាននាក់), រុស្ស៊ី (ឆ្លងជាង៤លាននាក់), អង់គ្លេស(ឆ្លងជាង៤លាននានក់)…ជាដើម៕ដោយ:ម៉ៃទី