(កំពង់ចាម)៖ ក្រសួងវប្បធម៌ និងវិចិត្រសិល្បៈនៅថ្ងៃទី​១ ដើមខែកញ្ញានេះ បានដាក់ឱសានវាទ ៣ ថ្ងៃឱ្យម្ចាស់​ភោជនីយដ្ឋានស្មៅទន្លេ លោក ប៉េង ឈុន រុះរើរូបសប្បនិម្មិតតួប៉មប្រាសាទនគរបាជ័យ ស្ថិតនៅ​ភោ​ជ​នីយដ្ឋានស្មៅទន្លេ ភូមិទី២ សង្កាត់វាលវង់ ក្រុងកំពង់ចាម ខេត្តកំពង់ចាម។
ក្រសួងវប្បធម៌អះអាងថា រូបសិប្បនិម្មិតតួប៉មប្រាសាទនគរបាជ័យ​ ដែលដាក់តាំងនៅ​ភោជនី​យ​ដ្ឋាន​​​ស្មៅទន្លេ ជាប្រភេទរូបសិប្បនិម្មិតតួប៉ម មានសណ្ឋានខុសទម្រង់ទ្រង់ទ្រាយដើម រចនា​បថ​ខ្មែរ ដោយយកគំរូតួប៉មមកពុះញ៉ែកចេញជាពីរចំណែក។ ក្រសួងស្នើឱ្យលោក ប៉េង ឈុន ម្ចាស់​ភោជ​នីដ្ឋានស្មៅទន្លេក្នុងរយៈពេល៣ថ្ងៃ រុះរើតួប៉មប្រាសាទនគរបាជ័យនេះចេញ ដើម្បីចូល​រួម​ថែរក្សា អភិរក្ស និង​លើកតម្កើងសម្បត្តិបេតិកភណ្ឌវប្បធម៌ជាតិ ឱ្យមានភាពឧត្តុង​ឧត្តម និងជា​កេរ្តិ៍ដំ​ណែល​​របស់​ជាតិ។
ជុំវិញបញ្ហានេះ មានមតិមួយចំនួនលើកឡើងថា ក្រសួងគួមានការសរសើ និងលើកទឹកចិត្ត​ចំពោះ​គំនិតច្នៃប្រឌិត ដើម្បីទាក់ទាញទេសចរណ៍ជាតិ និងអន្តរជាតិ ឱ្យចូលមក​ទស្សនា​កាន់តែច្រើន។
ប៉ុន្តែយ៉ាងណាក៏មានមតិមួយចំនួនសុំការអធ្យាស្រ័យពីក្រសួង ដោយផ្គុំរូបប្រាសាទនេះចូលគ្នាវិញ ហើយរក្សាទុកនៅកន្លែងភោជនីដ្ឋានដដែល។
សូមជម្រាបថា ប្រាសាទនគរបាជ័យមានទីតាំងស្ថិតនៅក្នុងខេត្តកំពង់ចាម ស្ថាបនាដោយព្រះបាទជ័យវរ្ម័នទី៧ នាសតវត្សទី១៣ តាមលំនាំរចនាបថបាយ័ន។ទស្សនៈវិស័យដើមនៃសំណង់ប្រាសាទនេះគឺឧទ្ទិសដល់ព្រះពុទ្ធសាសនា និងព្រហ្មញ្ញសាសនា រហូតមកដល់បច្ចុប្បន្នស្ថានភាពប្រាសាទនេះគឺនៅរឹងមាំល្អណាស់ សម្រាប់ការទស្សនាកម្សាន្ត ហើយក៏បន្សល់ទុកនូវផ្ទាំងសិលាចារិកក៏ដូចជាចម្លាក់នានាស្ថិតនៅក្នុងលំនាំដើមទាំងអស់។ ចំណែកសំណង់ព្រះវិហារព្រះពុទ្ធសាសនា ដែលស្ថាបនាក្រោយសម័យអង្គរនោះក៏ស្ថិតនៅល្អតាមលំនាំស្ថាបត្យកម្មដើមផងដែរ។ដោយ ម៉ៃទី (សូមជួយផ្តល់ដំណឹងផ្សេងៗមក សម្លេងខ្មែរពិតាមរយៈ 012 98 48 55 (Line, WhatsApp,Telegram))