ខេត្តសៀមរាប៖តាមសេចក្ដីរាយការណ៍បានដឹងថាល្បែងស៊ីសងភ្នាល់ តាមប្រព័ន្ធអិនធើណេត កំពុងបើកឲ្យភ្ញៀវចូលលេង យ៉ាងគគ្រឹក មិនទាន់ត្រូវបានអាជ្ញាធរសមត្ថកិច្ចបង្ក្រាបចុះនៅឡើយទេ ខណ:នៅក្រុងសៀមរាប តែងតែមានអំពើចោរកម្មកើតឡើងផងដែរ។
ទីតាំងល្បែងភ្នាល់តាមអិនធើណេតនេះស្ថិតនៅក្រោយផ្សារលើធំថ្មី ត្រង់ចំណុចកែងច្រមុះជ្រូក ក្នុងភូមិតាវៀន សង្កាត់សាលាកំរើកក្រុងសៀមរាប ដែលមានយីហៅ១៦៨ ២៤H។
បើតាមប្រភពបានរាយការណ៍ថា
ល្បែងប្រភេទអនឡាញនេះបានបើកដំណើរការជិតមួយខែមកហើយ ដោយមានអ្នកចូលទៅចាក់លេងមិនខ្លាចអ្វីទាំងអស់។
ទោះយ៉ាងណាគេនៅមិនទាន់ស្គាល់ម្ចាស់ទីតាំងល្បែងនេះនៅឡើយទេគ្រាន់តែគេដឹងថាការបើកលេងបែបនេះអាចរត់ការជាមួយសមត្ថកិច្ចពាក់ព័ន្ធទើបគេអាចដំណើរការបានដោយរលូន។
សូមរំលឹកថាកាលពី​ថ្ងៃទី​១៨ខែសីហាឆ្នាំ​២០១៩ សម្ដេចតេជោនាយក​រដ្ឋមន្ត្រី ហ៊ុន សែន បាន​បញ្ជា​ឲ្យ​អាជ្ញាធរ បង្ក្រាប​អាជីវកម្ម​ល្បែងភ្នាល់​តាម​អិនធើណិត ដែល​គ្មាន​អាជ្ញាប័ណ្ណ និង​ហាម​មិន​ឲ្យ​ចេញ​អាជ្ញាប័ណ្ណ​ថ្មី ឬ​បន្ត​អាជ្ញា​បណ្ណ ដល់​ក្រុមហ៊ុន​ល្បែង​តាម​អន​ឡាញ​គ្រប់​ប្រភេទ​។ សារាចរ​ណែនាំ​របស់​នាយករដ្ឋមន្ត្រី​កម្ពុជា បាន​សរសេរ​ដូច្នេះ​ថា​៖
«​ពួកឧក្រិដ្ឋជន​បរទេស​មួយចំនួន បាន​ជ្រក​ក្រោមរូបភាព​ល្បែងភ្នាល់​ប្រភេទ​នេះ ដើម្បី​បោកប្រាស់​ជំរិត​ទារប្រាក់​ពី​ជនរងគ្រោះ ទាំង​ក្នុង​និង ក្រៅប្រទេស ធ្វើ​ឲ្យ​ប៉ះពាល់​ដល់​សន្តិសុខ សណ្ដាប់ធ្នាប់​សាធារណៈ និង​របៀបរៀបរយ​ ក្នុងសង្គម»។
ដោយឡែកអាជ្ញាធរខេត្តសៀមរាបលោកទៀ សីហា កាលពីថ្ងៃទី១២ខែមិថុនាឆ្នាំ២០២០ ក៏បានដាក់ផែនការឲ្យសមត្ថកិច្ចត្រូវបង្ល្រាបល្បែងស៊ីសងផងដែរ។ ក៏ប៉ុន្តែរហូតមកដល់ពេលនេះគេនៅមិនទាន់ឃើញមានការបង្ក្រាបបានមួយករណីនៅឡើយទេ។
សូមបញ្ជាក់ផងថានៅក្រុងសៀមរាបជារើយៗតែងតែមានអំពើចោរកម្មលួចឆក់ជាបន្តបន្ទាប់ កត្តាបែបនេះធ្វើឲ្យប្រជាពលរដ្ឋមានការព្រួយបារម្ភយ៉ាងខ្លាំងអំពីអសន្តិសុខនៅក្នុងមូលដ្ឋានរបស់ពួកគាត់៕សូមជួយផ្តល់ដំណឹងផ្សេងៗមក សម្លេងខ្មែរពិតាមរយៈ 012 98 48 55 (Line, WhatsApp,Telegram)