(ភ្នំពេញ)៖ នៅថ្ងៃព្រហស្បតិ៍ ទី ១៨ ខែមិថុនា ឆ្នាំ ២០២០ នេះ ​ជា​ព្រះរាជ​ពិធី​បុណ្យ​ចម្រើន​ព្រះជន្ម​គម្រប់ ខួប ៨៤ យាង​ចូល ៨៥ ព្រះវស្សា របស់​សម្តេច​ព្រះមហាក្សត្រី​នរោត្តម​មុនិនាថ សីហនុ ព្រះវររាជ​មាតា​ជាតិខ្មែរ ក្នុង​សេរីភាព សេចក្តីថ្លៃថ្នូរ និង​សុភមង្គល​។
សម្តេច​ព្រះមហាក្សត្រី​នរោត្តម​មុនិនាថ សីហនុ ព្រះវររាជ​មាតា​ជាតិខ្មែរ ក្នុង​សេរីភាព សេចក្តីថ្លៃថ្នូរ និង​សុភមង្គល មាន​ព្រះនាម​ដើម​ថា ប៉ូល មូនីក អ៊ី​ហ្សី​។​សម្តេចម៉ែ​ទ្រង់​ប្រសូត​នៅ​ថ្ងៃទី​១៨ ខែមិថុ​នា ឆ្នាំ​១៩៣៦ ដោយ​មាន​ព្រះបិតា​ជា​ជនជាតិ​បារាំង​ដើមកំណើត​អ៊ីតាលី និង​មាន​ព្រះ​មាតា​ជា​ជនជាតិ​ខ្មែរ​។​
សម្តេចព្រះនរោត្តមមុនិនាថ សីហនុ អាច​មានបន្ទូល​ជា​ភាសា​បារាំង និង​អង់គ្លេស ក្រៅពី​ភាសា​កំណើត​។ ព្រះអង្គ​បាន​រៀប​អភិសេក​ជាមួយ​ព្រះករុណា ព្រះបាទ​សម្តេច​នរោត្តម​សីហនុ ព្រះមហាវីរក្សត្រ ព្រះ​បរម​រតន​កោដ្ឋ ក្នុង​ខែ​មេសា ឆ្នាំ​១៩៥២​។​សម្តេច​ព្រះមហា ក្សត្រី ព្រះអង្គ​មាន​ព្រះរាជបុត្រ​ពីរ​អង្គ​គឺ សម្តេចព្រះ​បរមនាថ​នរោត្តម សីហ​មុនី ព្រះមហាក្សត្រ​នៃ​ព្រះរាជាណាចក្រ​កម្ពុជា និង​ព្រះអង្គម្ចាស់​នរោត្តម​នរិន្ទ្រ​ពង្ស ។​ប៉ុន្តែ​ព្រះអង្គម្ចាស់​នរោត្តម នរិន្ទ្រ​ពង្ស ទ្រង់​បាន​សោយ​ទិវង្គត​នៅ​ឆ្នាំ​ ២០០៣ ដោយ​ជំងឺ​បេះដូង​។
​សម្តេច​ព្រះវររាជ​មាតា​ជាតិខ្មែរ ព្រះអង្គ​បាន​យាង​តាម​ព្រះករុណា ព្រះមហាវីរក្សត្រ ស្ទើរ​គ្រប់​ទិស​ទី​ក្នុង​គ្រប់​កាលៈទេសៈ មិន​ថា​ក្នុងសម័យ​តស៊ូ​ក្រោយ​រដ្ឋប្រហារ​ថ្ងៃ​ទី​១៨ ខែ​មីនា ឆ្នាំ​១៩៧០ សម័យ​​​កម្ពុជា​ប្រជាធិបតេយ្យ សម័យ​ការតស៊ូ​ត្រី​ភាគី​នៅ​តំបន់​ជាយ​ដែន​ខាងលិច ឬ​សម័យ​ព្រះរា​ជាណាចក្រ​កម្ពុជា​ទី​២​នោះឡើយ​។
នៅ​ឆ្នាំ​១៩៩២ ព្រះករុណា​ព្រះបាទ​សម្តេចព្រះ​នរោត្តម​សីហនុ ព្រះមហាវីរក្សត្រ ព្រះ​បរម​រតន​កោដ្ឋ ព្រះអង្គ​បាន​ប្រទាន​គោរមងារ​ព្រះអង្គ​ពី​អ្នក​ម្នាង ជា​សម្តេច​ព្រះ​ជាយា​នៅ​ឆ្នាំ​១៩៩៣ ទ្រង់​បាន​ទទួល​គោរមងារ​ជា សម្តេច​ព្រះរាជអគ្គមហេសី ។​នៅ​ថ្ងៃទី​២៩ ខែតុលា ឆ្នាំ​២០០៤ សម្តេចម៉ែត្រូវទ្រង់ទទួលបានព្រះមរមងារថា សម្តេច​ព្រះមហាក្សត្រី​នរោត្តម មុនីនាថ សីហនុ ព្រះវររាជ​មាតា​ជាតិខ្មែរ ក្នុង​សេរីភាព សេចក្តី​ថ្លៃថ្នូរ និង​សុភមង្គល​៕សូមជួយផ្តល់ដំណឹងផ្សេងៗមក សម្លេងខ្មែរពិតាមរយៈ 012 98 48 55 (Line, WhatsApp,Telegram)