អំណោយរបស់ឯកឧត្តមនាយឧត្តមសេនីយ៍ឯក ហ៊ុន ម៉ាណែត អគ្គបញ្ជាការរងកងយោធពលខេមរភូមិន្ទនិងជាមេបញ្ជាការកងទ័ពជើងគោក តាមរយៈអាជ្ញាធរខេត្តកំពង់ចាម បានចែកជូនដល់ប្រជាពលរដ្ឋចំនួន ៣៧៨ គ្រួសារ ដែលរងគ្រោះដោយជំនន់ទឹកភ្លៀង កាលពីរសៀលថ្ងៃទី២៧ ខែតុលា ឆ្នាំ ២០២០ នៅមុខសាលាខេត្តកំពង់ចាម ។
ថ្លែងទៅកាន់ពលរដ្ឋក្នុងឱកាសនោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានមានប្រសាសន៍ថា ក្នុងនាមអាជ្ញាធរខេត្ត ឯកឧត្តមសូមចូលរួមសោកស្ដាយ និងចូលរួមរំលែកទុក្ខលំបាកទាំងឡាយ ជាមួយបងប្អូនប្រជាពលរដ្ឋយើងទាំងអស់ ដែលរងគ្រោះដោយសារជំនន់ទឹកភ្លៀង នឹងជំនន់ទឹកទន្លេមេគង្គ ។
ឯកឧត្តមអភិបាលខេត្តថ្លែងបន្តថា ឆ្នាំ ២០២០នេះ ខុសពីឆ្នាំមុនៗ ដោយសារនៅ ដើមរដូវវស្សា ទឹកទន្លេមេគង្គមិនឡើង ហើយភ្លៀងក៏មិនសូវមាន ដែលបង្កការរាំងស្ងួត ធ្វើឱ្យខូចខាតដំណាំកសិកម្មប្រជាពលរដ្ឋមួយចំនួន។ ប៉ុន្តែនៅពេលចាប់ផ្ដើមចេញវស្សា បែរជាទទួលរងនូវទឹកភ្លៀងយ៉ាងគំហុក ដែលធ្វើឱ្យប៉ះពាល់ដល់ការបង្កបង្កើនផលរបស់ បងប្អូនប្រជាពលរដ្ឋ នៅស្រុកជើងព្រៃនិងស្រុកបាធាយ ដែលដាំស្រូវពង្រោះបណ្ដេញទឹក ប៉ុន្តែទិន្នន័យនៃការខូចខាតមិនទាន់ដឹងនៅឡើយទេ ដោយសារទឹកភ្លៀងនៅបន្តធ្លាក់ជា បន្តបន្ទាប់ទៀត ក្នុងនោះមានទឹកភ្លៀងនៅក្នុងតំបន់ និងទឹកដែលហូរ ចេញពីតំបន់បឹង ទន្លេសាប ។
ឯកឧត្តមបានឱ្យដឹងទៀតថា ជំនន់ទឹកភ្លៀងនេះ បានជន់លិចតាមដងផ្លូវ និងហូរចូលផ្ទះ ប្រជាពលរដ្ឋមួយចំនួន នៅក្នុងក្រុងកំពង់ចាម និងស្រុកកំពង់សៀម ដែលមិនទាន់មាន ប្រព័ន្ធលូច្បាស់លាស់ ។ ទន្ទឹមនឹងនោះ ខាងអាជ្ញាធរខេត្ត និងមន្ត្រីពាក់ព័ន្ធក៏បានចុះពិនិត្យ និងមានវិធានការបន្ទាន់ដើម្បីកាយបើកមុខទឹក បង្ហូររំដោះទឹកកុំឱ្យលិចយូរ ដែលបង្ក ការរំខានដល់ប្រជាពលរដ្ឋយើង។
ជាមួយគ្នានេះអាជ្ញាធរខេត្តបានដាក់ផែនការស្ដារឡើងវិញ ដោយជំរុញឲ្យស្ថាប័ន មន្ទីរចំនួន ៤ មានដូចជា មន្ទីរសាធារណការនិងដឹកជញ្ជូន ត្រូវជួសជុលជាបន្ទាន់ នូវផ្លូវជាតិដែលរងការខូចខាត ចំណែកមន្ទីរអភិវឌ្ឍន៍ជនបទត្រូវចុះពិនិត្យមើល និងជួសជុលឡើងវិញនូវផ្លូវលំទាំងឡាយ នៅក្នុងសមត្ថកិច្ចរបស់ខ្លួន, រីឯមន្ទីរធនធានទឹកត្រូវចុះពិនិត្យមើលផ្នែកទំនប់ ព្រមទាំងទ្វារទឹកទាំងឡាយដែលរង ការខូចខាត ដោយសារទឹកឡើងគំហុកក្នុងរយៈពេលប៉ុន្មានថ្ងៃមុននេះ។ ដោយឡែកមន្ទីរ កសិកម្មរុក្ខាប្រមាញ់ និងនេសាទ ត្រូវបូកសរុបផែនការផ្ដល់ជូននូវពូជស្រូវ ពូជដំណាំ ដល់បងប្អូនកសិករដែលមានស្រូវនិងដំណាំបានរងការខូចខាត ៕ ​ដោយ ម៉ៃទី (សូមជួយផ្តល់ដំណឹងផ្សេងៗមក សម្លេងខ្មែរពិតាមរយៈ 012 98 48 55 (Line, WhatsApp,Telegram))