ភ្នំពេញ៖ ឯកឧត្តម ស សុខា បុត្រាសម្តេចក្រឡាហោម ស ខេង និងជាតំណាងរាស្ត្រមណ្ឌលព្រៃវែង បានបញ្ចេញសារ កោតសរសើរចំពោះមន្ត្រីនគរបាលអន្តោប្រវេសន៍ប្រចាំព្រលានយន្តហោះអន្តរជាតិភ្នំពេញដែលភាគច្រើន បានប្រើប្រាស់ពាក្យពេចន៍ និងកាយវិការ ប្រកបដោយក្រមសីលធម៌ល្អ សាកសមជាមន្ត្រីរាជការល្អ ក្នុងការបម្រើសេវាកម្មជូនប្រជាពលរដ្ឋ និងប្រទេសជាតិទាំងមូល ។

ឯកឧត្តមតំណាងរាស្ត្រវ័យក្មេង បានបញ្ចេញការកោតសរសើរបែបនេះ ក្នុងឱកាសដែលឯកឧត្តមក៏ដូចភ្ញៀវជាតិនិងអន្តរជាតិជាច្រើនបានទទួលសេវាកម្មយ៉ាងកក់ក្តៅ ពី មន្ត្រីនគរបាលអន្តោប្រវេសន៍ នាព្រឹកថ្ងៃទី៣ ខែសីហា ឆ្នាំ២០១៨នេះ ខណៈដែលឯកឧត្តមត្រូវធ្វើដំណើរទៅក្រៅប្រទេស។

ជាមួយនឹងការកោតសរសើរ ឯកឧត្តមតំណាងរាស្ត្រ ក្នុងនាមពលរដ្ឋខ្មែរមួយរូប ឯកឧត្តមស្នើសុំឲ្យមន្ត្រីព្រលានយន្តហោះទាំងអស់ ដែលបានធ្វើល្អហើយសូមបន្តធ្វើល្អទៀត ហើយសម្រាប់អ្នកមិនទាន់បានធ្វើល្អទេ សូមកែប្រែ និងធ្វើឲ្យបានល្អ ព្រោះនេះមិនមែនត្រឹមតែជាមុខមាត់កម្ពុជាយើងប៉ុណ្ណោះទេ វាក៏ជាមុខមាត់លើឆាកអន្តរជាតិផងដែរ ព្រោះព្រលានយន្តហោះអន្តរជាតិ មានទាំងភ្ញៀវជាតិ និងភ្ញៀវអន្តរជាតិឆ្លងកាត់ ៕