ក្រុមការងារមន្ទីរសាធារណការ និងដឹកជញ្ជូនខេត្តកែបបាននិងកំពុងសម្រុកលាងសម្អាតផ្លូវជាតិ33A
(ខេត្តកែប)៖ ដើម្បីសម្រួលសុវត្ថិភាពដល់ដំណើរកម្សាន្តរបស់ក្រុមអ្នកទេសចរជាតិ-អន្តរជាតិ ក្នុងឱកាសបុណ្យភ្ជុំបិណ្ឌប្រពៃណីជាតិខ្មែរនាអំឡុងពេលខាងមុខនេះ ក្រុមការងារមន្ទីរសាធារណការ និងដឹកជញ្ជូនខេត្តកែប បាននិងកំពុងសម្រុកលាងសម្អាតផ្លូវជាតិ33Aយ៉ាងសស្រាក់សស្រាំ ចាប់ពីរង្វង់មូលសេះស រហូតដល់ឆ្នេរលេងទឹក។
ជាមួយនឹងការលាងសម្អាតផ្លូវជាតិ33Aនេះ បើតាមការលើកឡើងពីក្រុមការងារជំនាញឱ្យដឹងថា ជាទូទៅដងផ្លូវជាតិ33A ចាប់ពីរង្វង់មូលសេះសឆ្ពោះទៅកាន់ឆ្នេរកែបដែលមានចម្ងាយ៧.៨០០ម៉ែត្រពិតជាផ្លូវមួយដ៏សំខាន់ដែលអ្នកដំណើរផងទាំងពួងចាត់ទុកជាផ្លូវឆ្ពោះទៅកាន់គោលដៅរបស់ខ្លួនដែលពួកគេបានប៉ងប្រាថ្នាជាយូរមកហើយ ពិសេសក្រុមអ្នកទេសចរមកពីគ្រប់បណ្តាខេត្តនានា តែងនាំគ្នាសម្រុកធ្វើចរាចរទៅ សម្រាក លម្ហែ កម្សាន្តនៅរមណីយដ្ឋានខេត្តកែបយ៉ាងច្រើនស្អេកស្កះ។ជាងនេះទៅទៀតផ្លូវជាតិ33A បន្ទាប់ពីត្រូវបានក្រុមការងាររបស់មន្ទីរសាធារណការ និងដឹកជញ្ជូនខេត្តកែបស្ថាបនាបានរួចរាល់ជាស្ថាពរ ក៏មានអ្នកដំណើរឆ្លងកាត់ទៅមកកាន់តែច្រើនឡើងៗពីមួយថ្ងៃទៅមួយថ្ងៃ ហើយក្រៅពីមាររថយន្តទេសចរណ៍រាប់ពាន់គ្រឿងក្នុងមួយថ្ងៃៗបើកបរឆ្លងកាត់នោះ ក៏មានរថយន្តដឹកដីមួយចំនួនបើកបរតាមផ្លូវនេះដែរ ដោយបានទម្លាក់អាចម៍ដីពាសពេញផ្លូវផងដែរ ទើបក្រុមការងារសស្រាក់សស្រាំប្រើរថយន្តលាងសម្អាតគ្មានពេលទំនេរបែបនេះ។
បន្ទាប់ពីផ្លូវជាតិ33A ស្ថាបនាបានរួចរាល់កាលណា មហាជនក៏ដូចជាអ្នកដំណើរបាននាំគ្នាសប្បាយរីករាយ និងកោតសរសើរនូវស្នាដៃរបស់ក្រុមការងារជំនាញ ដែលខិតខំពុះពារស្ថាបនាដងផ្លូវមួយនេះទាំងលំបាកលំបិន បើទោះជាមានភ្លៀងធ្លាក់យ៉ាងណាក៏មិនរាថយដែរ។
សូមជម្រាបថា ផ្លូវជាតិ33A ពីរង្វង់មូលសេះសឆ្ពោះទៅកាន់ឆ្នេរកែប ដែលមានប្រវែង៧.៨០០ម៉ែត្រ ជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រហូតមកដល់ពេលនេះត្រូវក្រុមការងារមន្ទីរសាធារណការ និងដឹកជញ្ជូនខេត្តស្ថាបនាបានរួចរាល់យ៉ាងល្អឥតខ្ចោះ ប្រកបដោយគុណភាព និងមានទ្រង់ទ្រាយធំទូលា ដោយស្ថាបនាទៅតាមស្តង់ដារបច្ចេកទេស លម្អដោយសួននៅចំកណ្តាល បំពាក់ដោយបង្គោលភ្លើងប្រើដោយឋាមពលព្រះអាទិត្យ ហើយផ្លូវជាតិលេខ33Aនេះ នឹងត្រូវសម្ពោធដាក់ឱ្យដំណើរការនាពេលយ៉ាងខ្លីខាងមុខនេះហើយ៕
![]()
![]()