ស្លាប់ម្នាក់របួសធ្ងន់ពីរនាក់ ដោយសាររថយន្តពីរគ្រឿងព្រលះគ្នាពេញទំហឹង
.jpg)
កំពត ៖ យ៉ាងហោចណាស់មនុស្សម្នាក់បានស្លាប់និងពីរនាក់ទៀតរងរបួសយ៉ាងតំណំ ក្នុងហេតុការណ៍គ្រោះថ្នាក់ចរាចរណ៍ រវាងរថយន្តនិងរថយន្តក្នុងទិសដៅបញ្ច្រាស់គ្នា ស្ថិតលើកំណាត់ផ្លូវជាតិលេខ៣ កំពត-ព្រះសីហនុ កាលពីវេលាម៉ោង ១១និង១៥នាទីព្រឹក ថ្ងៃទី២៧ខែសីហា ឆ្នាំ២០១៧ ត្រង់ចំណុចមុខសាលាឃុំបឹងទូក ក្នុងភូមិទទឹងថ្ងៃ ឃុំបឹងទូក ស្រុកទឹកឈូ ខេត្តកំពត។
ដោយស្រង់តាមសំដីសមត្ថកិច្ចបានបញ្ជាក់ថា ករណីគ្រោះថ្នាក់ចរាចរណ៍ដ៏ធ្ងន់ធ្ងរនេះ គឺបានកើតឡើងខណៈពេលមេឃកំពុងភ្លៀងខ្លាំង ដោយរថយន្តអ្នកស្លាប់និងរបួស ម៉ាកកូរ៉េពណ៌ខៀវចំណុះមួយតោនកន្លះគ្មានស្លាកលេខ ដែលមានមនុស្សជិះបីនាក់រួមមាន ថៅកែម្នាក់ តែកុងម្នាក់និងព្រូរថយន្ត បានធ្វើដំណើរពីលិចទៅកើត ក្នុងល្បឿនលឿន លុះមកដល់កន្លែងកើតហេតុរថយន្តខាងលើក៏បានជែងជាមួយរថយន្តមួយគ្រឿងផ្សេងទៀត ដែលបើកបរស្របគ្នាទើបជ្រុលទៅបុកចំពីផ្នែកចំហៀងមុខខាងឆ្វេងរថយន្តម៉ាកហីុយ៉ាន់ដាយពណ៌សដែលបើកបរពីកើតទៅលិច ទិសដៅបញ្ច្រាស់ បណ្តាលឲ្យរថយន្តកូរ៉េពណ៌ខៀវក្រពិតមុខ ហើយមនុស្សក្នុងរថយន្តស្លាប់និងរបួសគ្មានសល់ម្នាក់ឡើយ។
សមត្ថកិច្ចបានបញ្ជាក់ថា ក្រោយពីមានការប៉ះទង្គិចគ្នា ម្ចាស់រថយន្តហ៊ីយ៉ាន់ដាយពេលដឹងថា ភាគីរថយន្តកូរ៉េស្លាប់និងរងរបួសធ្ងន់ ក៏បើកទ្វារឡានដាក់មេប្រូចបាត់តែម្តង ប៉ុន្តែសមត្ថកិច្ចក៏បានស្រាវជ្រាវដឹងអត្តសញ្ញាណអ្នកបើកបររថយន្តហីុយ៉ាន់ដាយហើយគឺឈ្មោះ ញៀន ស្តើង ភេទប្រុស អាយុ៣១ឆ្នាំ មានទីលំនៅភូមិវត្តអង្គ ឃុំព្រៃឃ្មុំ ស្រុកទឹកឈូ ខេត្តកំពត។ដោយឡែកភាគីរថយន្តកូរ៉េពណ៌ខៀវដែលជារថយន្តបង្កមានគ្នាបីនាក់ ទី១. ឈ្មោះ ង៉ែត ចាន់ដារ៉ា ភេទប្រុស អាយុ៣៥ឆ្នាំ ស្លាប់នៅកន្លែងកើតហេតុ ជាម្ចាស់រថយន្ត មានទីលំនៅភូមិអូរក្រសារ សង្កាត់អូរក្រសារ ក្រុង-ខេត្តកែប ទី២.ឈ្មោះ សុខ នៅ ភេទប្រុស អាយុ៣៨ឆ្នាំ រស់នៅក្នុងខេត្តកំពង់ស្ពឺ រងរបួសធ្ងន់ និងទី៣.ឈ្មោះ សុខ ពៅ ភេទប្រុស អាយុ២២ឆ្នាំ ជាព្រូរថយន្ត មានទីលំនៅក្នុងភូមិបុះត្របែក ឃុំត្រពាំងព្រីង ស្រុកទឹកឈូ ខេត្តកំពត របួសធ្ងន់ ហើយក៏ត្រូវបានសមត្ថកិច្ចបញ្ជូនទៅសង្គ្រោះភ្លាមៗ នៅឯមន្ទីរពេទ្យផងដែរ។
ក្រោយពីវាស់វែងមធ្យោបាយពាក់ព័ន្ធ ត្រូវបានប៉ូលិសនាំយកទៅរក្សាទុកក្នុងការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តកំពតសម្រាប់ដោះស្រាយនៅពេលក្រោយ។ចំណែកសពជនរងគ្រោះសមត្ថកិច្ចក៏បានប្រគល់ជូនក្រុមគ្រួសារដឹកទៅគេហដ្ឋានដើម្បីចាត់ចែងធ្វើបុណ្យតាមប្រពៃណី៕ ណារិទ្ធ
.jpg)
![]()
![]()