អ្នកនាំពាក្យ ៖ ទាហានមួកខៀវកម្ពុជាដែលបាត់ខ្លួននៅអាហ្វ្រិកកណ្តាល ត្រូវស្លាប់ទាំងអស់
អ្នកនាំពាក្យក្រសួងការពារជាតិ លោកនាយឧត្តមសេនីយ៍ ឈុំ សុជាតិ បានឲ្យបណ្តាញព័ត៌មានក្នុងស្រុកដឹងថា ទាហានមួកខៀវកម្ពុជាដែលបាត់ខ្លួនចំនួន៣នាក់ ក្រោយការវាយប្រហារនៅអាហ្វ្រិកកណ្តាលនោះ បានស្លាប់ទាំងអស់ ដោយគេបានរកឃើញសាកសពនៅចម្ងាយប្រមាណ២គីឡូម៉ែត្រពីកន្លែងកើតហេតុ។
គួររំលឹកថា នៅវេលាម៉ោងប្រមាណ៨យប់ ថ្ងៃទី៨ ខែឧសភា ដែលត្រូវនឹងម៉ោង២ទៀបភ្លឺ ថ្ងៃទី៩ ឧសភា ឆ្នាំ២០១៧ ម៉ោងនៅកម្ពុជា មានករណីវាយប្រហារដោយក្រុមប្រដាប់អាវុធមិនស្គាល់អត្តសញ្ញាណ មកលើក្បួនដំណើររបស់កងកម្លាំងរបស់អង្គការសហប្រជាជាតិ ដែលក្នុងនោះមានកម្លាំងវិស្វកម្មកម្ពុជា១ក្រុមផងដែរ។
សរុបមក ការវាយប្រហារ ដែលត្រូវសន្និដ្ឋានថា ជាការវាយប្រហាររំដោះអ្នកទោសដោយក្រុមឧទ្ទាម បានសម្លាប់កងកម្លាំងកម្ពុជាចំនួន៤នាក់ និងបណ្តាលឲ្យរបួសម្នាក់។
កងកម្លាំងកម្ពុជាដែលស្លាប់ទាំង៤នាក់នោះរួមមាន ៖ ១.លោកពលបាលឯក អ៊ឹម សំ បុគ្គលិកបើកបរប៊ុលដូស៊ែរ , ២.លោកអនុសេនីយ៍ត្រី ស៊ាង នរិន្ទ ជំនួយការត្រួតពិនិត្យគុណភាព, ៣.លោកពលបាលឯក មុំ តុលា ជំនួយការបើកបរអ៊ិចស្ការវ៉ាទ័រ និង ៤.លោកអនុសេនីយ៍ត្រី ម៉ៅ អេង បុគ្គលិកពេទ្យ៕
![]()
![]()
![]()
![]()
![]()