(ភ្នំពេញ​)៖ ដោយ​ផ្អែកទៅលើ​សេចក្ដីជូនដំណឹង​របស់​សហគមន៍​អឺរ៉ុប ដែល​ដាក់​បម្រាម​ចំពោះ​ការនាំ​ចូល​អង្ករ​មាន​ផ្ទុក​សារធាតុ Tricyclazole ដែល​បាន​កម្រិត​លើសពី​០,០១ មី​លី​ក្រាម ក្នុង​១​គីឡូក្រាម ទៅកាន់​សហភាព​អឺរ៉ុប​នោះ កាលពី​ថ្ងៃទី​២៧ មីនា ម្សិលមិញ ក្រសួងកសិកម្ម បានចេញ​បញ្ជា ឲ្យ​បញ្ឈប់​ការនាំ​ចូល ផ្គត់ផ្គង់ ចែកចាយ ថ្នាំ​កសិកម្ម​ប្រភេទ​នេះ នៅក្នុង​ប្រទេស​កម្ពុជា ។​

​ក្រសួង​នេះ​បានលើកឡើង​នៅក្នុង​សេចក្ដីជូនដំណឹង​មួយ​របស់ខ្លួន​ថា ដើម្បី​រក្សា​គុណភាព និង​ធានា​សុខមាលភាព​សាធារណៈ ក៏ដូចជា​រក្សា​នូវ​កេរ្តិ៍ឈ្មោះ នូវ​គុណភាព​អង្ករ​របស់​កម្ពុជា និង​ឆ្លើយតប​ទៅ នឹង​តម្រូវការ​ទីផ្សារ​អន្តរជាតិ​នោះ ក្រសួងកសិកម្ម រុក្ខាប្រមាញ់ និង​នេសាទ សូម​ធ្វើ​ការណែនាំ​ដូចតទៅ ៖

1.​    ​រាល់​អ្នកប្រើប្រាស់​ថ្នាំ​កសិកម្ម​ទាំងអស់ ត្រូវ​បញ្ឈប់​ការប្រើប្រាស់​ថ្នាំ​កសិកម្ម ដែលមាន​សារធាតុ​សកម្ម Tricyclazole ទៅលើ​ដំណាំ​ស្រូវ ដែល​អាច​បន្សល់ទុក​នូវ​សំ ណ​ល់​ថ្នាំ​កសិកម្ម នៅក្នុង​អង្ករ ។​

2.​    ​គ្រប់​ក្រុមហ៊ុន ដែល​ធ្វើ​ពាណិជ្ជកម្ម​ទាំងអស់ ត្រូវ​បញ្ឈប់​ការ​នាំចូល​ថ្នាំ​កសិកម្ម ដែលមាន​សារធាតុ​សកម្ម Tricyclazole ។​

3.​    ​រាល់​អ្នកផ្គត់ផ្គង់​ចែកចាយ​ទាំងអស់ ត្រូ​បញ្ឈប់​ការផ្គត់ផ្គង់​ចែកចាយ ដល់​សាខា ឬ​ដេប៉ូ​លក់ដុំ លក់រាយ ថ្នាំ​កសិកម្ម ដែលមាន​សារធាតុ​សកម្ម Tricyclazole​។​

4.​    ​មន្ទីរ​កសិកម្ម​រុក្ខាប្រមាញ់ និង​នេសាទ ត្រូវ​ចុះ​ត្រួតពិនិត្យ និង​ណែនាំ នូវ​ការប្រើប្រាស​ថ្នាំ​កសិកម្ម ដែលមាន​សារធាតុ​សកម្ម Tricyclazole និង​ត្រូវ​ផ្សព្វផ្សាយ​ឲ្យ​បាន​ទូលំទូលាយ​ដល់​កសិករ ។​

5.​    ​នាយកដ្ឋាន​នីតិកម្ម កសិកម្ម ត្រូវ​បញ្ឈប់​ការចុះបញ្ជី​កា និង​អនុញ្ញាត​ឲ្យ​នាំចូល​ថ្នាំ​កសិកម្ម ដែលមាន​សារធាតុ Tricyclazole ។​

6.​    ​អគ្គនាយកដ្ឋាន​កសិក​ម្ម ត្រូវ​ស្រាវជ្រាវ​បន្ថែម ដើម្បី​រក​ប្រភេទ​ថ្នាំ​កសិកម្ម​ថ្មី ដែល​គ្មាន​សារធាតុ​ហាមឃាត់​មក​ជំនួស​វិញ និង​ត្រូវ​បន្ត​ពង្រឹង​ផ្នែកអនាម័យ និង​ភូតគាម​អនាម័យ ពិសេស​សំណល់​ថ្នាំ​កសិកម្ម​ឲ្យ​បាន​សមស្រប​តាម​វិធាន​បច្ចេកទេស មុន​អនុញ្ញាត​ឲ្យ​នាំចេញ​អង្ករ ដោយ​សហការ​ជាមួយ​ស្ថាប័ន​ពាក់ព័ន្ធ ក្នុងករណី​ចាំបាច់ ៕