ភាស៊ីគ្រប់ប្រភេទត្រូវបានធ្វើការដេញថ្លៃភាស៊ី សម្រាប់អាជីវកម្មឆ្នាំ២០១៨ខាងមុខ
(កែប)៖ នៅព្រឹកថ្ងៃទី២០ខែវិច្ឆិកា ឆ្នាំ២០១៧នេះ លោក អ៊ុក ថា អភិបាលរង នៃគណៈអភិបាលខេត្តកែប និងជាអនុប្រធានគណៈកម្មការដេញថ្លៃភាស៊ី បានធ្វើពិធីដេញថ្លៃភាស៊ីគ្រប់ប្រភេទ សម្រាប់ធ្វើអាជីវកម្មឆ្នាំ២០១៧ ក្នុងខេត្តកែប។
ការដេញថ្លៃភាស៊ីនេះ ក៏មានការចូលរួមពីសំណាក់លោក កែវ ហុង ប្រធានមន្ទីរសេដ្ឋកិច្ច និងហិរញ្ញវត្ថុខេត្តកែប លោក លោកស្រី ជាប្រធាន អនុប្រធាន មន្ទីរស្ថាប័នពាក់ព័ន្ធនានា អាជ្ញាធរដែនដីគ្រប់ជាន់ថ្នាក់ និងក្រុមអ្នកធ្វើអាជីវកម្មផ្សេងៗ រួមមាន៖ ផ្សារកែប ផ្សារសេះស សត្តឃាតដ្ឋាន ចំណតជលយានយន្តនេសាទផ្សារក្តាម ចំណតជលយានឆ្នេរចាក់ខ្សាច់ថ្មី និងចំណតជលយានយន្តផែកែប-កោះទន្សាយ។ដោយឡែកភាស៊ីចំណតរថយន្តខេត្តកែប គឺមិនត្រូវបានដាក់ឲ្យដេញថ្លៃឡើយ ព្រោះភាស៊ីចំណតត្រូវស្ថិតក្រោមការវិនិយោគ។
បើតាមគោលការណ៍ និងនីតិវិធីនៃការដេញថ្លៃភាស៊ី គឺត្រូវបានកំណត់ដេញថ្លៃពីតម្លៃព្យួរឡើងទៅ ដោយអនុវត្តដេញជាបីលើក ដូចដែលបានកំណត់៧ប្រការនៃសៀវភៅបន្ទុក។ចំពោះអ្នកអ្នកដេញថ្លៃបានជាបណ្តោះអាសន្ន អាជីវករនោះត្រូវបង់ប្រាក់កក់ធានាជាស្ថាពរ២៥%(១/៤)នៃតម្លៃដេញបានចូលជាថវិកាខេត្ត ក្នុងរយៈពេលមួយសប្តាហ៍ បន្ទាប់ពីដេញថ្លៃបានជាកំហិត។ហួសរយៈពេលនេះ ត្រូវចាត់ទុកថា អាជីវករនោះបោះបង់ចោលសិទ្ធិដេញថ្លៃរបស់ខ្លួន ហើយត្រូវរឹបអូសប្រាក់កក់បណ្តោះអាសន្ម២០% និងមិនអនុញ្ញាតឲ្យចូលដេញថ្លៃរយៈពេល០៣ឆ្នាំ និងត្រូវរៀបចំដេញថ្លៃភាស៊ីមូលដ្ឋាននោះជាថ្មីឡើងវិញ ហើយករណីមូលដ្ឋានភាស៊ីណាមួយ ដេញថ្លៃមានភាពមិនប្រក្រតី គណៈកម្មការដេញថ្លៃមានសិទ្ធិព្យួរជាបណ្តោះអាសន្ន។ចំពោះអាណតិ្តធ្វើអាជីវកម្មភាស៊ី ម្ចាស់ភាស៊ីត្រូវគោរព និងអនុវត្តតាមកិច្ចសន្យារបស់ខ្លួននៃប្រការទាំងឡាយណាដែលបានចែងក្នុងសៀវភៅបន្ទុកឲ្យបានដាច់ខាត។
លោក អ៊ុក ថា អនុប្រធានគណៈកម្មការដេញថ្លៃភាស៊ីខេត្តកែប បានបញ្ជាក់ថា បច្ចុប្បន្នប្រាក់ចំណូលបានមកពីថ្លៃភាស៊ីមានការថយចុះ ព្រោះតែម្ចាស់អាជីវកម្មទាំងនោះមិនសូវយកចិត្តទុកដាក់។ដូច្នេះ លោកសូមក្រើនរំលឹកដល់ម្ចាស់អាជីវកម្មដែលដេញថ្លៃបានហើយ សូមប្រញាប់ប្រញាល់អនុវត្តគោលការណ៍របស់ខ្លួនឲ្យមានប្រសិទ្ធភាពខ្ពស់ ពិសេសត្រូវ តែអនុវត្តតាមកិច្ចសន្យាគ្រប់ប្រការទាំងឡាយ ដែលបានចែងក្នុងសៀវភៅបន្ទុករួចមកហើយ។/
![]()
![]()