​កំពង់ស្ពឺ ៖ បុរស​ជនជាតិ​វៀតណាម​ម្នាក់ បាន​បើក​រ៉ឺម៉ក ​ម៉ូតូ​ពាក់​ស្លាក​លេខ​ប្រទេស​ ដើរ​លក់ដូរ​ឥ​វ៉ាន់​តាម​ភូមិ​នានា ក្នុង​ខេត្តកំពង់ស្ពឺ ​ត្រូវបាន ​កំលាំង​សមត្ថកិច្ច​​ការិយាល័យ​អន្តោប្រវេសន៍ នៃ​ស្នងការដ្ឋាន​ ខេត្តកំពង់ស្ពឺ ធ្វើការ​ឃាត់ខ្លួន​សាកសួរ​រកឃើញថា ​ជនបរទេស​រូបនោះ ​បាន​ស្នាក់​នៅ​លើ​ទិដ្ឋាការ ​និង​រកស៊ី​លក់​ដូច​ចានឆ្នាំង​ និង​សម្ភារៈ​ផ្ទះបាយ​ដោយ​គ្មាន​អនុញ្ញាត ​ត្រឹមត្រូវ​ពី​ក្រសួង​ពាក់ព័ន្ធ ។

លោក​ ឈួន យឿន នាយការិយាល័យ អន្តោប្រវេសន៍ ​បាន​ឱ្យដឹងថា ​ជនជាតិ​វៀតណាម​ដែល​មក​លួច​រកស៊ី​ដោយ​គ្មាន​ច្បាប់​ ក្នុងប្រទេស​កម្ពុជា ហើយ​ត្រូវ​បាន​កំលាំង​ជំនាញ​ឃាត់ខ្លួន កាលពី​ព្រឹក​ថ្ងៃទី ០៩ ខែសីហា ​ឆ្នាំ​២០១៦​នេះ ក្នុង​ក្រុង​ច្បារមន ​ ខេត្តកំពង់ស្ពឺ​ ខណៈ​បើក​រ៉ឺម៉ក ​លក់​ឥ​វ៉ាន់​តាម​ភូមិ​នានា មាន​ឈ្មោះ TO GNOC PHI ភេទ​ប្រុស អាយុ ២៣​ឆ្នាំ រស់នៅ​ខេត្ត​តៃនិញ ​ប្រទេស​វៀតណាម កាន់​លិខិតឆ្លងដែន​ លេខ C1670833 មិន​មាន​ទិដ្ឋការ​E ដោយ​ប្រើប្រាស់​ត្រា​ចូល​មក​កម្ពុជា​រយៈពេល​មួយខែ​ ប្រើប្រាស់​មធ្យោបាយ​រ៉ឺម៉ក​ម៉ូតូ​មួយគ្រឿង ​ ម៉ាក​ហុងដា C100 ពណ៌​ព្រីង​ទំ ស៊េរី​ចាស់ ពាក់ ស្លាក​លេខ 70-P1.78 83 ដឹក​សម្ភារៈ​ផ្ទះបាយ​ និង​របស់របរ​ផ្សេងៗ​ទៀត ។

លោក​បន្តថា ជនជាតិ​វៀតណាម​ខាង​ដែល​ឆ្លងដែន​មក​លួច​ប្រកប​របរ​រកស៊ី​ដោយ​ខុសច្បាប់​ក្នុង​ព្រះរាជាណាចក្រ​កម្ពុជា​នោះ ត្រូវបាន​បំពេញបែបបទ​បញ្ជូន​អគ្គនាយកដ្ឋាន អ​ត្តោ​ប្រវេសន៍ ក្រសួងមហាផ្ទៃ ដើម្បី​ចាត់ការ​បន្ត ។

​បច្ចុប្បន្ន​សមត្ថកិច្ច​ជំនាញ​កំពុងតែ​រៀបចំ​ឯកសារ​ជនជាតិ​វៀតណាម​ដែល​មក​រក​ស៊ី​ខុសច្បាប់​ខាងលើ​ទៅកាន់​អគ្គនាយកដ្ឋាន​អន្តោប្រវេសន៍ ​ក្រសួងមហាផ្ទៃ ​ដើម្បី​បញ្ជូន​ទៅកាន់​ប្រទេស​វៀតណាម​វិញ ៕