យុវជនម្នាក់ បោលម៉ូតូលឿន ជ្រុលកៀររថយន្ដ ដួលបោកក្បាល នឹងថ្នាល់ស្លាប់
ភ្នំពេញ ៖ យុវជនម្នាក់ បានស្លាប់ភ្លាមៗនៅនឹងកន្លែងកើតហេតុ បន្ទាប់ពីជិះម៉ូតូលឿនពេក ជ្រុលទៅបុកកៀរទាក់ដៃចង្កូត ជាមួយរថយន្ដមួយគ្រឿង ដែលកំពុងបើកបរស្របទិសគ្នា បណ្ដាលឲ្យដួលស្លាប់ ភ្លាមៗ តែម្ដង ហើយម៉ូតូបានជ្រុលហួសទៅមុខជាង២០ម៉ែត្រ ទើបឈប់។
ហេតុការណ៍ នេះកើតឡើង កាលពីវេលាម៉ោង៧និង៥០នាទីយប់ថ្ងៃទី០៩ ខែសីហា ឆ្នាំ២០១៦ ស្ថិតនៅលើកំណាត់ផ្លូវជាតិលេខ៤ ត្រង់ចំណុចភ្លើងស្តុបផ្លូវកែងរវាងផ្លូវជាតិលេខ៤និងផ្លូវទំនប់កប់ស្រូវ ស្ថិតនៅក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ ។
តាមប្រភពពីប្រជាពលរដ្ឋនៅកន្លែង បានឲ្យដឹងថា មុនកើតហេតុ គេឃើញជនរងគ្រោះ ជិះម៉ូតូ ម្នាក់ឯង បោះពួយល្បឿនលឿន ក្នុងទិសដៅ ពីលិចទៅកើត លុះមកដល់ចំណុចកើតហេតុ ជ្រុល ទាក់ដៃចង្កូតកៀរជាមួយរថយន្តមួយគ្រឿងមិនចាំម៉ាក ដែលបើកបរស្របទិសគ្នាបណ្តាលឲ្យ បោកដួលអូស ធ្លាក់ជនរងគ្រោះ បោកនិងថ្នល់ស្លាប់ភ្លាមៗ នៅនឹងកន្លែង ។ចំណែកម៉ូតូជ្រុលហួសបោលទៅមុខ ឃ្លាតពីជនរងគ្រោះ ជាង២០ម៉ែត្រទើបដួល។ ជនរងគ្រោះមានឈ្មោះ សៀ ចាន់ណា ភេទប្រុសអាយុជាង២០ឆ្នាំ ។ ជនរងគ្រោះ ជិះម៉ូតូមួយគ្រឿង ម៉ាកឃ្លីក ពណ៌ស ពាក់ស្លាកលេខ ភ្នំពេញ 1BW-7673 ។
ប្រភព បន្ដថា ភ្លាមៗ នោះភាគីខាងរថយន្ត មិនបានឈប់បង្អែបង្អង់យូរនាំវែងឆ្ងាយឡើយ ដោយបានបន្តដំណើរទៅមុខបាត់ បន្សល់ទុកជនរងគ្រោះ នៅកន្លែងកើតហេតុ ។ ក្រោយពេលកើតហេតុសមត្ថកិច្ចមូលដ្ឋាន បានចុះមកជួយអន្តរាគមន៍ ស្រាវជ្រាវរកសាច់ញាតិក្រុមគ្រួសារមកយកសពទៅធ្វើបុណ្យតាមប្រពៃណី ៕