ពលរដ្ឋ ត្រូវមានការប្រុងប្រយ័ត្ន ចំពោះស្ថានភាពទឹកជំនន់ នារដូវវស្សាឆ្នាំនេះ
).jpg)
ឧត្តរមានជ័យ ៖ អាជ្ញាធរខេត្តឧត្តរមានជ័យ បានធ្វើការអំពាវនាវដល់ប្រជាពលរដ្ឋ ដែលស្ថិតនៅតំបន់ ងាយរងគ្រោះទាំងអស់ ឱ្យមានការប្រុងប្រយ័ត្នខ្ពស់ ចំពោះស្ថានភាពទឹក នារដូវវស្សា ដោយការពារកូនៗ ធ្វើការហាមប្រាម ចំពោះការលេងទឹក ដែលអាចបណ្តាលឱ្យមានគ្រោះថ្នាក់ ។
អាជ្ញាធរ ក៏បានអំពាវនាវបន្ថែមទៀតថា សូមឲ្យមាន ការប្រុងប្រុងប្រយ័ត្នចំពោះខ្សែចរន្តអគ្គិសនី រកទីទួលមានសុវត្ថិភាពទុកដាក់ទ្រព្យសម្បត្តិ សត្វពាហនៈ បង្ការស្បៀងផ្សេងៗ និងសូមធ្វើការផ្តល់ដំណឹងមកអាជ្ញាធរមូលដ្ឋានឱ្យបានទាន់ពេលវេលា ដើម្បីមានវិធានការដោះស្រាយទៅតាមស្ថានភាពជាក់ស្តែង។
លោក អ៊ុន សុភ័ក្រ អភិបាល នៃគណៈអភិបាលក្រុងសំរោង មានប្រសាសន៍បែបនេះ ក្នុងឱកាសអញ្ជើញចុះសាកសួរសុខទុក្ខប្រជាពលរដ្ឋ ភូមិឈើក្រំ សង្កាត់កូនក្រៀល ក្រុងសំរោង ខេត្តឧត្តរមានជ័យ ដែលកំពុងតែទទួលរងនូវផលប៉ះពាល់ពីជំនន់ទឹកភ្លៀង ជាប់ៗគ្នារយះពេល២ថ្ងៃ គឺថ្ងៃទី៤ដល់ថ្ងៃទី៥ ខែសីហា ឆ្នាំ២០១៦ នឹងដើម្បីរិះរកវិធានការដោះស្រាយជាបឋមនៅក្នុងស្ថានភាពជាក់ស្តែង។
នៅក្នុងការចុះជួយដោះស្រាយបញ្ហាប្រឈមភ្លាមៗរបស់ប្រជាពលរដ្ឋនាឱកាសនោះ លោកអភិបាលក្រុង បានសាកសួរសុខទុក្ខ ព្រមទាំងបានបង្ហាញអំពីកង្វល់ និងការយកចិត្តទុកដាក់ជាខ្លាំងចំពោះសុខសុវត្ថិភាពរបស់ប្រជាពលរដ្ឋ តាមរយៈការរិះរកមធ្យោបាយនានាដើម្បីជួយសម្រួលដល់ការចល័ត ទ្រព្យសម្បត្តិរបស់ប្រជាជនទៅរកទីមានសុវត្ថិភាព ដូចជាការផ្តល់ ការុង ដើម្បីច្រកស្រូវ ច្រកសម្ភារៈប្រើប្រាស់ផ្សេងៗ រួមទាំង មានការសហការជាមួយមន្ទីរសាធារណៈការ និងដឹកជញ្ជូនខេត្តដើម្បីបើកមុខទឹកលូនានាដែលស្ទះ ពន្លឿនដល់កម្រិតទឹកស្រក។
សូមបញ្ជាក់ថា ទឹកជំនន់នេះ បានធ្វើឱ្យខូចខាតទ្រព្យសម្បត្តិ សត្វពាហនៈ កសិផល ដំណាំដាំដុះនានា ហើយបើទោះបីជាកម្រិតទឹកដែលលិចឆាប់ស្រកចុះក៏ដោយ ក៏នៅតែជាក្តីបារម្ភយ៉ាងធំ ព្រោះមេឃនៅតែបន្តធ្លាក់ភ្លៀង ជាមួយគ្នានេះ ភូមិដទៃទៀតដែលស្ថិតនៅក្រោមខ្សែទឹកហូរ រួមមាន ភូមិត្រពាំងវែង ភូមិខ្ទុំ ក៏នឹងត្រូវប្រឈមនិងរងផលប៉ះពាល់ពីជំនន់ទឹកភ្លៀងនេះដែរ ៕
![]()
![]()
![]()
![]()
![]()