ម៉ូតូសង់ឌ្រីម ប្រលះគ្នាជាមួយម៉ូតូឃ្លីក ពេញទំហឹង បណ្ដាលឲ្យមនុស្ស២នាក់សន្លប់ធំ
).jpg)
បាត់ដំបង ៖ ករណីគ្រោះថ្នាក់ចរាចរណ៍ រវាងម៉ូតូ click និង ម៉ូតូ Honda dream សាកល្បងកម្លាំងគ្នាពេញទំហឹង បណ្ដាលឲ្យយុវជន២នាក់ បានដេកសន្លប់ស្ដូកស្ដឹង ទាំងអស់គ្នា កាលពីវេលាម៉ោងប្រមាណ ២០នាទី យប់ នៅថ្ងៃទី ២៦ ខែសីហា ឆ្នាំ២០១៦ ស្ថិតនៅចំណុចខាងត្បូងសាលាបូរ៉ា ក្នុង ក្រុមទី ៧ ភូមិវត្តរំដួល សង្កាត់ចំការ សំរោង ក្រុងបាត់ដំបង ខេត្តបាត់ដំបង ។
តាមប្រភពសាក្សីពីកន្លែងកើតហេតុ បាននិយាយថា នៅមុនពេលកើតហេតុ គេឃើញមានម៉ូតូមួយគ្រឿងម៉ាកឌ្រីម ធុនសេ១២៥ ពណ៌ខ្មៅ ពាក់ស្លាកលេខ បាត់ដំបង 1B-8301 ដែលបើកបរយ៉ាងលឿន ដោយក្មេងប្រុសម្នាក់ ក្នុងទិសដៅ ពីត្បូងទៅជើង ដល់ចំណុច កើតហេតុ ក៏ស្រាប់តែមានការរេចង្កូតទៅកណ្តាលទ្រូងផ្លូវ ព្រមទាំងបានឆ្លងបន្ទាត់អ័ក្ស ថែមទៀត ធ្វើអោយជ្រុលចង្កូតទៅ បុកនឹងម៉ូតូមួយគ្រឿងទៀតម៉ាក ឃ្លីក គ្មានស្លាកលេខ ដែលកំពុងបើកមកពីមុខក្នុងទិសដៅច្រាស់គ្នា យ៉ាងពេញទំហឹង បណ្តាលអោយភាគី ទាំងសងខាងហោះផ្លោងទៅលើទ្រូងផ្លូវព្រមទាំងដេកសន្លប់ ទាំងអស់តែម្តង ព្រមទាំងមាន ស្នាមរបួសពេញខ្លួនផងដែរ ។
ក្រោយពេលកើតហេតុទើបគេដឹងថា ភាគីម៉ូតូឃ្លីកមានឈ្មោះ ម៉ៅ មី ភេទប្រុស អាយុ២១ឆ្នាំ រស់នៅភូមិដាំស្ពៃ សង្កាត់ស្លាកែត ក្រុងបាត់ដំបង ចំណែកភាគី ម៉ូតូឌ្រីម គឺបើកបរដោយក្មេងប្រុសម្នាក់ដែលទើបតែមានអាយុ១៤ឆ្នាំ ប៉ុណ្ណោះ និងរស់នៅភូមិវត្តរំដួល សង្កាត់ចំការសំរោង ក្រុងបាត់ដំបង ។
បច្ចុប្បន្នសមត្ថកិច្ច បានបញ្ជូនជនរងគ្រោះទាំងពីរនាក់ទៅកាន់មន្ទីរពេទ្យហើយ ដោយម្នាក់ ទៅមន្ទីរពេទ្យបង្អែកខេត្ត ឯម្នាក់ទៀត ទៅកាន់មន្ទីរពេទ្យអ៊ីមេចិនស៊ី ដើម្បីសង្គ្រោះផងដែរ។ ដោយឡែក ធ្យោបាយ ធ្វើដំណើរទាំងពីរគ្រឿងក៏ត្រូវបានកំលាំងនាំយកទៅរក្សាទុក នៅការិយាល័យចរាចរណ៍ផ្លូវគោកខេត្ត ជាបណ្តោះអាសន្ន ៕
![]()
![]()
![]()
![]()
![]()