បុរសម្នាក់កំពុងជិះម៉ូតូ ត្រូវបាន រថយន្ដហ៊ីយាន់ដាយ បុកដួលសន្លប់ស្តូកស្តឹង
).jpg)
ប៉ៃលិន៖ បុរសម្នាក់បានសន្លប់ស្តូកស្តឹង ខណៈកំពុងជិះម៉ូតូតែម្នាក់ឯងសុខៗ ស្រាប់តែត្រូវរថយន្តហ៊ីយាន់ដាយ មួយគ្រឿង បានបើកចេញពីការ៉ាស់ មកបុកពេញទំហឹង ត្រូវបានសមត្ថកិច្ចចរាចរណ៍ ដឹកបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិនភ្លាមៗ ។
ហេតុការណ៍ខាងលើនេះ បានកើតឡើងកាលពីវេលាម៉ោង១១និង០០នាទី ថ្ងៃទី២២ ខែសីហា ឆ្នាំ២០១៦ តាមបណ្តោយផ្លូវជាតិលេខ៥៧ ត្រង់ចំណុចផ្លូវ បំបែកជាបី ក្នុងភូមិដីក្រហម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
សាក្សីនៅកន្លែងកើតហេតុ បានឲ្យដឹងថា មុនពេល កើតហេតុគេបានឃើញបុរសម្នាក់ជិះម៉ូតូ ម៉ាកវ៉េវ ពណ៌ខ្មៅ ពាក់ស្លាកលេខ ពោធិ៍សាត 1F-5575 តាមបណ្តោយផ្លូវជាតិលេខ៥៧ ក្នុងទិសដៅពីត្បូងទៅជើង ខណៈមកដល់ចំណុចកើតហេតុ ក៏ស្រាបតែមានរថយន្ត១គ្រឿង ម៉ាកហ៊ីយាន់ដាយ បានបើក ចេញពីការ៉ាស់ ក្នុងទិសដៅពីលិចទៅកើត ហើយក៏បុកម៉ូតូយ៉ាងពេញទំហឹង បណ្តាលឲ្យដួលសន្លប់ស្តូកស្តឹង នៅនឹងកន្លែងកើតហេតុ ។ ចំណែករថយន្តបង្ក បានថយក្រោយចូលក្នុងការ៉ាស់វិញ ហើយអ្នកបើកបរបានរត់គេចខ្លួនបាត់ស្រមោល ។ ក្រោយពេលកើតហេតុ ជនរងគ្រោះ ត្រូវបានរថយន្ត របស់សមត្ថកិច្ចចរាចរណ៍ ដឹកយកទៅព្យាបាលនៅមន្ទីរពេទ្យបង្អែកខេត្តប៉ៃលិនភ្លាមៗ ។
សមត្ថកិច្ចចរាចរណ៍ បានឲ្យដឹងថា ជនរងគ្រោះមានឈ្មោះ អែល ឌូ ភេទប្រុស អាយុ៤៦ឆ្នាំ មានទីលំនៅភូមិក្រពើពីរ ឃុំក្រពើពីរ ស្រុកវាលវែង ខេត្តពោធិសាត់ រងរបួសបែកក្បាលផ្នែកខាងក្រោយ និងផ្ទៃមុខ ។ ចំណែកអ្នកបើកបររថយន្តបង្កឈ្មោះ អួក មិនស្គាល់ត្រកូល ភេទប្រុស អាយុ២៤ឆ្នាំ មានទីលំនៅភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន បើករថយន្តម៉ាកហ៊ីយានដាយ ពណ៌ស ពាក់ស្លាកលេខភ្នំពេញ 3D-3556 ចេញពីការ៉ាស់ ក្នុងទិសដៅពីលិចទៅកើត ហើយក៏បុកម៉ូតូយ៉ាងពេញទំហឹង បណ្តាលឲ្យដួលសន្លប់ស្តូកស្តឹងនៅនឹងកន្លែងកើតហេតុ តែម្តង ។ បច្ចុប្បន្នម៉ូតូជនរងគ្រោះ និងរថយន្តបង្ក ត្រូវ សមត្ថកិច្ចយកទៅរក្សាទុកនៅការិយាល័យចរាចរណ៍ ខេត្តប៉ៃលិន ៕
![]()
![]()
![]()
![]()
![]()