អាវុធហត្ថ ចាប់ខ្លួនជនសង្ស័យចំនួន២នាក់ ដកហូតថ្នាំញៀនម៉ាទឹកកក១៧ថង់
បន្ទាយមានជ័យ ៖ ជនសង្ស័យ២នាក់ ត្រូវបាន កំលាំងអាវុធហត្ថក្រុងប៉ោយប៉ែត ចុះល្បាតក្នុងមូលដ្ឋាន ឈានដល់ការឃាត់ខ្លួន បានជាបន្ដបន្ទាប់ ឆែកឆេររកឃើញថ្នាំញៀន១៧ថង់តូច ។
របាយការណ៍អាវុធហត្ថ បានឲ្យដឹងថា កងរាជអាវុធហត្ថក្រុងប៉ោយប៉ែត សហការជាមួយកម្លាំង ស្នាក់ការ សន្តិសុខ៥៦៨ បានធ្វើការចុះល្បាត ក្នុងភូមិសាស្ត្រ ក្រុងប៉ោយប៉ែត ខេត្តបន្ទាយមានជ័យស្រាប់តែប្រទះឃើញជនសង្ស័យម្នាក់ កំពុងលួចជក់គ្រឿងញៀនអាវុធហត្ថ បានធ្វើការឃាត់ខ្លួន និងដកហូត វត្ថុតាងគ្រឿងញៀនប្រភេទយ៉ាម៉ា ទឹកកក បានចំនួនមួយកូនថង់តូច។ ក្រោយមកទៀតនៅវេលាម៉ោង៨យប់ថ្ងៃទី២១ ដដែល កំលាំងអាវុធហត្ថ បានធ្វើការស្រាវជ្រាវ បន្តនិងធ្វើការឃាត់ខ្លួនជនសង្ស័យ បានចំនួនម្នាក់ទៀត ធ្វើការឆែកក្នុងខ្លួន អាវុធហត្ថបានដកហូតវត្ថតាងគ្រឿងញៀន២កូនថង់តូច ហើយអាវុធហត្ថ បានបន្តធ្វើការឆែកនៅក្នុងបន្ទប់លេខ២២៧ ក្នុងសណ្ឋាគារហ្គូតឡាក់ របស់ជនសង្ស័យ បានរកឃើញថ្នាំញៀនចំនួន១៤ ថង់តូច បន្ថែមទៀត សរុបថ្នាំញៀនមានចំនួន១៧ថង់តូចមានទម្ងន់១០.១៦ក្រាម និងទូរស័ព្ទដៃ២គ្រឿង ប្រាក់ខ្មែរ៧ម៉ឺនរៀល ប្រាក់ដុល្លា១៣ដុល្លា។
ជនសង្ស័យទាំង២នាក់ ក្រោយពីឃាត់ខ្លួនហើយអាវុធហត្ថក្រុងប៉ោយប៉ែត បានបញ្ជូនមកទីបញ្ជាការដ្ឋានកងរាជអាវុធហត្ថខេត្តបន្ទាយមានជ័យ ដើម្បីធ្វើការសាកសួរបន្ត។
លោកវរៈសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យទទួលបន្ទុកលើការងារបទល្មើសគ្រឿងញៀន បានឲ្យដឹងថា ជនសង្ស័យទាំង២នាក់ នោះ ១ឈ្មោះ ឡាយលីម៉េង ប្រុសអាយុ២១ឆ្នាំ សព្វថ្ងៃរស់នៅក្នុងបន្ទប់ជួលក្នុងភូមិប៉ោយប៉ែត សង្កាត់ ប៉ោយប៉ែត ខេត្តបន្ទាយមានជ័យ អ្នកប្រើប្រាស់ ២ឈ្មោះ ជា ផល្លា ប្រុសអាយុ៤៣រស់នៅក្នុងបន្ទប់ជួលលេខ២២៧ សណ្ឋាគារហ្គូដឡាត់ ក្នុងភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
នៅមុខអាវុធហត្ថជនសង្ស័យឈ្មោះ ជា ផល្លា បានឆ្លើយសារភាពថា រូបគេពិតជាបានប្រព្រឹត្តជួញដូរគ្រឿងញៀន ពិតប្រាកដ មែន ។ ដោយគ្រឿងទាំងអស់នេះ ខ្លួនបានទិញពីមនុស្សប្រុសម្នាក់ មិនស្គាល់ឈ្មោះមួយកូនថង់តូចតំលៃ១០ ដុល្លា ដើម្បីយកមកលក់បន្ត។ ក្រោយពីបានចំលើយសារភាពជនសង្ស័យ ហើយនោះត្រូវបានកសាងសំណុំរឿង និងបញ្ជូនទៅតុលាការខេត្តដើម្បីដាក់ទោសទៅតាមនីតិវិធីច្បាប់៕
![]()
![]()
![]()
![]()
![]()