ឃុំខ្លួនជនល្មើស៣នាក់ ក្នុងនោះមានប្អូនប្រុសអ្នកនាង ខៀវ សុខារ៉ាវី ម្នាក់ ពីបទ បាញ់សម្លាប់មនុស្សនៅស្តារម៉ាតក្បែរផ្សាររាត្រី
ភ្នំពេញ ៖ ជនសង្ស័យ៣នាក់ ក្នុងនោះមានប្អូនប្រុសបង្កើត របស់តារាសម្តែងអ្នកនាង ខៀវ សុខារ៉ាវី ម្នាក់ផងនោះ ត្រូវបានលោក ជួន សុរាសី ចៅក្រមស៊ើបសួរសាលាដំបូងរាជធានីភ្នំពេញ សម្រេច កាលពីរសៀលថ្ងៃទី១៧ ខែសីហា ឃុំខ្លួនដាក់ពន្ធនាគារ បណ្តោះអាសន្ន ពាក់ព័ន្ធការបាញ់សម្លាប់មនុស្ស ក្នុងស្តារម៉ាតក្បែរផ្សាររាត្រី ខណ្ឌដូនពេញ ។
លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ បញ្ជាក់ថា ជនសង្ស័យ ឈ្មោះ ផុន ភក្តី ប៉េអិម ខណ្ឌដូនពេញ ជាជនដៃដល់ ត្រូវបានចោទប្រកាន់ពីបទ ហិង្សាដោយចេតនា មានស្ថានទម្ងន់ទោស ដោយសារមរណភាពនៃជនរងគ្រោះ មាត្រា២២៤នៃក្រមព្រហ្មទណ្ឌ ។
ដោយឡែកឈ្មោះ ខៀវ ថនវ៉ាន់ឌី ត្រូវជាប្អូនប្រុសបង្កើតរបស់តារាសម្តែងអ្នកនាង ខៀវ សុខារ៉ាវី និង ឈ្មោះ និន រិន ត្រូវបានចោទប្រកាន់ពីបទហិង្សាដោយចេតនា និង កាន់កាប់អាវុធខុសច្បាប់ តាមមាត្រា២១៧ និងមាត្រា៤៩០នៃក្រមព្រហ្មទណ្ឌ ។
ហេតុការណ៍នេះ កើតឡើងកាលពីយប់ថ្ងៃទី១៣ ខែសីហា ឆ្នាំ២០១៦ នៅចំណុចមីនីម៉ាត ផ្ទះលេខ165Eo ផ្លូវព្រះស៊ីសុវត្ថិ ខណ្ឌដូនពេញ ក្បែរផ្សារាត្រី ។
ដើមចមនៃសំណុំរឿងនេះ ត្រូវបានប្រភពព័ត៌មានច្បាស់ការណ៍ បង្ហើបឲ្យដឹងថា ឈ្មោះ ផុន ភក្តី បានត្រូវមេបញ្ជាការប៉េអឹម ខណ្ឌដូនពេញ ចាត់តាំងឲ្យមកយាមប្រចាំការនៅបារបារាំងមួយកន្លែងយីហោ ហ្ស៊ូណា ។ លុះដល់យប់ថ្ងៃទី១៣ ខែសីហា ឆ្នាំ២០១៦ ម្ចាស់បារហ្ស៊ូណា បានទូរស័ព្ទ ហៅឈ្មោះ ផុន ភក្តី ឲ្យមកជាបន្ទាន់ព្រោះ មានក្រុមក្មេងស្ទាវ៦នាក់ រួមទាំងប្អូនប្រុសអ្នកនាង ខៀវ សុខារ៉ាវី ម្នាក់ផង បានចូលទៅអុកឡុកក្នុងបារ ហ្ស៊ូណា។ ពេលឈ្មោះ ផុន ភក្តី មកដល់ ពួកគេបានចាកចេញ មកសម្ងំផឹកស៊ីនៅមីនីម៉ាត ដែលជាចំណុចកើតហេតុ ទើបឈ្មោះ ផុន ភក្តី បានជិះម៉ូតូដេញតាមទៅដល់មីនីម៉ាត ក៏កើតជាជម្លោះឈានដល់ការវាយតប់គ្នាទៅវិញទៅមក ពោលគឺភាគីក្រុមប្អូនអ្នកនាង ខៀវ សុខារ៉ាវី បានប្រើដំបង និង ស្ទុះទៅយកកាំភ្លើងម៉ាក កា៥៩ មកបម្រុងបាញ់ផង ។
ដោយសារឈ្មោះ ផុន ភក្តី មានតែម្នាក់ឯង រីឯភាគីម្ខាងទៀតមានគ្នាដល់ទៅ៦នាក់ ធ្វើឲ្យឈ្មោះ ផុន ភក្តី ដកកាំភ្លើងបាញ់ចំនួន២គ្រាប់ បណ្តាលឲ្យចំឈ្មោះ សឺន ចាន់ដារ័ត្ន ភេទប្រុស អាយុ២៨ឆ្នាំ មុខរបរបុគ្គលិកក្រុមហ៊ុន អចលនទ្រព្យ ស្លាប់តែម្តង ៕
ដកស្រង់ ៖ គេហទំព័របាយ័ន