ជំនាញខាងគាស់ផ្ទះ លួចគ្រឿង មានតម្លៃ អស់លក្ខណ៍ ត្រូវជាប់ខ្នោះសមត្ថកិច្ច
).jpg)
បាត់ដំបង ៖ ជនសង្ស័យចំនួន៣នាក់ ដែលជាមុខសញ្ញាគាស់ផ្ទះ លួចគ្រឿងអលង្ការ មាស ពេជ្រ ដ៏មានតម្លៃនៅស្រុកសង្កែ ត្រូវបានកំលាំង នៃស្នងការដ្ឋាននគរបាលខេត្ត សហការជាមួយនឹងកំលាំងនៃអធិការដ្ឋាននគរបាលស្រុកសង្កែ ធ្វើការស្រាវជ្រាវរហូតឈានដល់ការឃាត់ខ្លួន ។
តាមរយៈការប្រើប្រាស់វិធានការជំនាញរបស់នគរបាល នៅថ្ងៃទី ៩ ខែ សីហា ឆ្នាំ ២០១៦ វេលាម៉ោង ១១ ថ្ងៃត្រង់នេះ ការិយាល័យជំនាញនៃស្នងការដ្ឋាន នគរបាលខេត្តបាត់ដំបង សហការជាមួយកម្លាំងជំនាញនៃអធិការដ្ឋាននគរបាលស្រុកសង្កែ បានធ្វើការបង្ក្រាបនិងឃាត់ខ្លួនជនសង្ស័យចំនួន ៣ នាក់ ដែលពាក់ព័ន្ធទៅ នឹងករណីគាស់ផ្ទះនៅចំនុចក្រុមទី១៥ ភូមិអន្លង់វិល ឃុំអន្លង់វិល ស្រុកសង្កែ ខេត្តបាត់ដំបង កាលពីថ្ងៃទី ៥ ខែកក្កដា ឆ្នាំ២០១៦ ចន្លោះពីម៉ោង៦ និង៣០នាទី ដល់ម៉ោង១០ និង៣០នាទីព្រឹក កន្លងទៅថ្មីៗនេះ ។
ជនសង្ស័យទាំង៣នាក់ ដែលសមត្ថកិច្ច ឃាត់ខ្លួនបានគឺ ១-ឈ្មោះ ឈៀង ពីង ភេទប្រុស អាយុ ១៩ ឆ្នាំ រស់នៅភូមិកំណប់ ឃុំអូរដំបង២ ស្រុកសង្កែ ខេត្តបាត់ដំបង ២-ឈ្មោះ ខៀវ ចាន់នី ភេទប្រុស អាយុ ២៥ ឆ្នាំ រស់នៅភូមិដំបូកខ្ពស់ ឃុំអូរដំបង២ ស្រុកសង្កែ ខេត្តបាត់ដំបង និង៣-ឈ្មោះ ឃី ជ័យ ភេទប្រុស អាយុ ២៦ ឆ្នាំ រស់នៅភូមិទំនប់ត្រកួន ឃុំឃ្លាំងមាស ស្រុកបវេល ខេត្តបាត់ដំបង ។
នៅក្នុងចំណោមពួកគេទាំង៣នាក់ គឺជនសង្ស័យឈ្មោះ ឈៀង ពីង បានសារភាព ថា ពេលចូលទៅលួចទ្រព្យសម្បត្តិ គឺខ្លួនទទួលបានតែ៥ម៉ឺនរៀលគត់ ដោយសារតែខ្លួនជាអ្នកយាមផ្លូវនៅខាងក្រៅ ដូច្នេះ ចំណែកអ្វីដែលលួចបាន គឺខ្លួនមិនបានដឹងថា មានអ្វីខ្លះនោះឡើយ ព្រោះពួកគេទាំងពីរនាក់ជាអ្នកចូលធ្វើសកម្មភាពនៅខាងក្នុង ។
ឆ្លងតាមរយៈនៃការស្រាវជ្រាវជនសង្ស័យទាំង៣នាក់ បានឆ្លើយសារភាពថា បក្សពួកខ្លួនធ្លាប់ធ្វើសកម្មភាព គាស់ផ្ទះចូលលួចយក ទ្រព្យសម្បត្តិរបស់ប្រជាពលរដ្ឋនៅក្នុងភូមិសាស្ត្រស្រុកសង្កែ នាពេលកន្លងមក ដែលពេលនេះ នគរបាលជំនាញកំពុងធ្វើការស្រាវជ្រាវយ៉ាងសកម្មបំផុត ដើម្បី ស្វែងរកភស្តុតាងបន្ថែម និងរៀបចំបញ្ជូនទៅតុលាការខេត្តបាត់ដំបងដើម្បីចាត់ការតាមផ្លូវច្បាប់ ។
គួរបញ្ជាក់ដែរថា ករណីនេះបានកើតឡើងទៅលើផ្ទះរបស់ជនរងគ្រោះឈ្មោះ ស៊ុយ សុវណ្ណា ភេទប្រុស អាយុ៦៥ឆ្នាំ រស់នៅត្រង់ចំណុចកើតហេតុខាងលើ ដោយបានបាត់បង់ នូវគ្រឿងអលង្ការ មួយចំនួនដូចជា ចិញ្ចៀនផ្លាទីន ដាំពេជ្រចំនួន២វង់ ដែលមានតម្លៃ ១៥០០ ដុល្លារ ចិញ្ចៀនផ្លាទីន១វង់ស្មើនឹង១៥០ ដុល្លារ ខ្សែដៃដាំត្បូង១ខ្សែ ស្មើនឹង ៣០០ ដុល្លារ និងក្រវិលផ្លាទីនមួយគូ តម្លៃ៥០ ដុល្លារ ។ ចំណែកគ្រឿងអលង្ការ របស់កូនស្រីឈ្មោះ ស៊ុយ ណារ៉ូន អាយុ៣១ឆ្នាំ ក៏បានបាត់ នូវគ្រឿងអលង្ការ មួយចំនួនដែរ ដូចជា ចិញ្ចៀនផ្លាទីនដាំពេជ្រចំនួន២វង់ តម្លៃ២០០០ដុល្លារ ខ្សែ ក ផ្លាទីនមួយខ្សែ ខ្សែដៃមាសមួយខ្សែ តម្លៃ៤៥០ ដុល្លារ ចិញ្ចៀនមាសមួយវង់ តម្លៃ ២២៥ ដុល្លារ ចិញ្ចៀនផ្លាទីន៤វង់ តម្លៃ៨០ ដុល្លារ ខ្សែដៃផ្លាទីន មួយខ្សែតម្លៃ២៥០ដុល្លារ និងកងដៃផ្លាទីនមួយកង ។ ឯកូនស្រីច្បងក៏បានបាត់របស់របរមួយចំនួនដែរ ដូចជា ខ្សែដៃផ្លាទីនដាំពេជ្រមួយខ្សែ តម្លៃ ២០០០ ដុល្លារ និងក្រវិលផ្លាទីន មួយគូ តម្លៃ៣០ ដុល្លារ ផងដែរ ដែលសរុបរួម គឺអស់គ្រឿងអលង្ការ ដ៏មានតម្លៃជាច្រើន ដែលជនមិនស្គាល់មុខ បានធ្វើសកម្មភាព គាស់ចម្រឹងបង្អួច និងចូលទៅប្រមូលគ្មានសល់ ៕
![]()
![]()
![]()
![]()
![]()