នគរបាលអន្តោប្រវេសន៍ បណ្ដេញជនជាតិវៀតណាម ១០នាក់ ចេញពីកម្ពុជា
កំពង់ស្ពឺ ៖ កម្ពុជាបណ្ដេញជនជាតិវៀតណាមចំនួន១០ នាក់ ទៅប្រទេសដើមវិញ បន្ទាប់ពីលួចឆ្លងដែនខុសច្បាប់ មកស្នាក់នៅកម្ពុជា ។ ជនជាតិវៀតណាម ទាំងនោះ ត្រូវបានកម្លាំងសមត្ថកិច្ច អន្តោប្រវេសន៍ នៃស្នងការដ្ឋាន ខេត្តកំពង់ស្ពឺ បានរកឃើញក្នុងសិប្បកម្មផលិតពុម្ពដែកមួយកន្លែង ក្នុងភូមិស្រែត្រោក ឃុំសែនដី ស្រុកសំរោងទង ខេត្តកំពង់ស្ពឺ កាលពីថ្ងៃទី០៦ ខែកក្កដា ឆ្នាំ២០១៦នេះ។
នគរបាលអន្តោប្រវេសន៍ បានឲ្យដឹងថា ជនបរទេស ជាជនជាតិវៀតណាមទាំង១០នាក់នោះ មានលិខិតឆ្លងដែន និងប្រថាប់ត្រាចេញចូលត្រឹមត្រូវ ប៉ុន្តែគ្មានទិដ្ឋាការស្នាក់នៅ សៀវភៅការងារនោះទេ គឺមានន័យពួកគេទាំង ១០នាក់អាចចូលមកកម្ពុជាក្នុងលក្ខណៈជាអ្នកទេសចរដើរកម្សាន្តលេង ដែលមានសុពលភាពរយៈពេល៣០ថ្ងៃ មិនអាចចូលមកដើម្បីបម្រើការងារ រកស៊ីបានឡើយ។ ប្រភពបន្តថា បន្ទាប់ពីការឃាត់ខ្លួនជនជាតិវៀតណាម ដែលមកប្រកបការងាររកស៊ីខុសដោយគ្មានច្បាប់នោះ សមត្ថកិច្ចបានធ្វើការណែនាំ អំពីផ្លូវច្បាប់ និងធ្វើកិច្ចសន្យាកំណត់រយៈពេល ១សប្ដាហ៍ទៀតត្រូវចេញឲ្យផុតពីទឹកដីកម្ពុជា។
យោង តាមមាត្រា២៦១ ច្បាប់ស្ដីពីការងារបានចែងថា គ្មានជនបរទេសណាម្នាក់ អាចប្រកបមុខរបរណាមួយ ដោយគ្មានប័ណ្ណការងារ និងសៀវភៅការងារ ដែលចេញដោយក្រសួងទទួលបន្ទុកវិស័យការងារ ចូលមកធ្វើការងារនៅកម្ពុជាបានឡើយ។ ដូច្នេះពលករជាតិវៀតណាមទាំង ១០នាក់នេះ ពួកគេបានប្រើប្រាស់លិខិតឆ្លងដែន និង គ្រាន់តែប្រថាប់ត្រាចេញចូល គ្មានទិដ្ឋាការស្នាក់នៅ (E.VISA) តាមច្រក ដែលមានសុពលភាពត្រឹម ៣០ថ្ងៃប៉ុណ្ណោះ ប៉ុន្តែមិនអាចប្រកបរបររកស៊ីយកកម្រៃបានឡើយ , មានន័យថា អាចចូលមកទេសចរ ឬ ស្នាក់នៅរយៈពេលខ្លី។
បច្ចុប្បន្ន ជនជាតិវៀតណាមទាំងនោះ ត្រូវបានសមត្ថកិច្ចធ្វើការអប់រំ ណែនាំ ធ្វើកិច្ចសន្យា ដោយកំណត់ទុករយៈពេល ១សប្ដាហ៍ទៀតត្រូវចេញពីទឹកដីកម្ពុជាឲ្យផុត៕
![]()
![]()
![]()
![]()
![]()