រឿងភ្នាក់ងារកាសែតរស្មីកម្ពុជា ដែលរងការគម្រាមវាយបំបែកក្បាល នឹងប្រកាសសាលក្រម នៅថ្ងៃទី១៩ សីហាខាងមុខ
បន្ទាយមានជ័យ ៖ នៅថ្ងៃទី១៩ សីហា ២០១៦ខាងមុខ តុលាការខេត្តបន្ទាយមានជ័យ នឹងប្រកាសសាលក្រមសំណុំរឿងព្រហ្មទណ្ឌដែលលោក វង្ស ធូ ភ្នាក់ងារព័ត៌មានកាសែតរស្មីកម្ពុជា និងវេបសាយ CEN ប្រចាំខេត្តបន្ទាយមានជ័យ ត្រូវក្រុមជនជាប់ចោទ៣នាក់ ធ្វើសកម្មភាពគម្រាម វាយបំបែកក្បាល ។
ការប្រកាសថា នឹងប្រកាសសាលក្រមខាងលើ ធ្វើឡើង កាលពីថ្ងៃទី២៦ ខែកក្កដា ឆ្នាំ២០១៦ បន្ទាប់ពីជំនុំជំរះដេញដោលចប់សប់គ្រប់ ដោយចៅក្រមជំនុំជំរះ ជួន សុវណ្ណ និងតំណាងអយ្យការលោក ផាន់ ភារម្យ ព្រះរាជអាជ្ញារងអមសាលាដំបូង ខេត្តបន្ទាយមានជ័យ នៅចំពោះមុខជនជាប់ចោទ ទាំង៣ និងដើមបណ្តឹងជាជនរងគ្រោះ លោក រង្ស ធូ ។
សំណុំរឿងព្រហ្មទណ្ឌដែលលើកយកមកជំរះ គឺសំណុំរឿងលេខ៥៩៩ ចុះថ្ងៃទី០១ ខែកញ្ញា ឆ្នាំ២០១៤ និងបានបញ្ចប់ កាស៊ើបសួរ នៃនីតិវិធីតុលាការ នៅថ្ងៃទី០២ ខែវិច្ឆិកា ឆ្នាំ២០១៥ ដែលសំណុំរឿងនេះ បានចោទប្រកាន់ជនត្រូវចោទចំនួន៣នាក់ សុទ្ធតែជាគ្រូបង្រៀនមានឈ្មោះ ១,ឈ្មោះ យ៉ា សុខុន ភេទប្រុស កើតឆ្នាំ១៩៨៥ ២,ឈ្មោះ វុន មុន្នី ភេទប្រុស កើតឆ្នាំ១៩៩៨២ ៣,ឈ្មោះ ប៉ៃ សុឃីម ភេទប្រុស កើតឆ្នាំ១៩៨២ អ្នកទាំង៣នៅក្រៅឃុំ និងបក្ខពួកត្រូវបានជាប់ចោទពីបទ ធ្វើអោយខូចខាតដោយចេតនា និងរំលោភលំនៅ ដ្ឋាន បទល្មើសព្រហ្មទណ្ឌចែងក្នុងមាត្រា៤១០ និងមាត្រា២៩៩ នៃក្រមព្រហ្មទណ្ឌ ប្រព្រឹត្តិនៅភូមិណាកាឆាយ ឃុំកូប ស្រុកអូរជ្រៅ ខេត្តបន្ទាយមានជ័យ កាលពីថ្ងៃទី០២ ខែសីហា ឆ្នាំ២០១៤ លើជនរងគ្រោះឈ្មោះ វង្ស ធូ ភេទប្រុស កើតឆ្នាំ១៩៧២ ក្នុងភូមិ និងរស់នៅធ្វើជាគ្រូបង្រៀនក្នុងសាលាវិទ្យាល័យកូបជាមួយគ្នា ។
ក្នុងសវនាការលោក ផាន់ ភារម្យ តំណាងអយ្យការសាលាដំបូងខេត្ត បានណែនាំដល់ជនត្រូវចោទទាំង៣នាក់ ថា ក្នុងនាមខ្លួនជាគ្រូបង្រៀន ដែលជាអ្នកអប់រំ ត្រូវប្រកាន់ភ្ជាប់ក្រមសីលធម៌ជាគ្រូបង្រៀន មិនគួរណាផឹកគ្រឿងស្រវឹងស្រែកឡូឡាក្នុងសាលារៀន ដល់យប់ជ្រៅរំខានដល់អ្នកដទៃ ដែលជាទង្វើរមិនមែនជាគំរូល្អ ។
ជាមួយគ្នានោះលោក ផាន់ ភារម្យ ក៏បានសំណូមពរដល់ចៅក្រមជំនុំជំរះ មានការបន្ធូរបន្ថយទោសដល់ជនត្រូវចោទទាំង៣នាក់ ដោយយោងទៅលើជនត្រូវចោទបានសារភាពទទួលកំហុសរបស់ខ្លួន ។ ក្នុងសំណុំរឿងនេះលោក វង្ស ធូ បានទារសំណង ពីជនត្រូវចោទនូវទឹកប្រាក់ចំនួន៨លានរៀល និងសូមអោយផ្ដន្ទាទោសជនត្រូវចោទទៅតាមផ្លូវច្បាប់ ៕
![]()
![]()
![]()
![]()
![]()