បើករថយន្ត CRVឆ្លងផ្លូវដែក ត្រូវរថភ្លើងបុកប៉ើងខ្ទាតជាច្រើនត្រឡប់ របួសធ្ងន់២នាក់
ព្រះសីហនុ ៖ រថយន្តCRV មួយគ្រឿង បើកឆ្លងផ្លូវដែកខ្វះការប្រុងប្រយ័ត្នត្រូវរថភ្លើងបុកប៉ើង ផ្លោងជាច្រើនត្រឡប់របួសមនុស្ស២នាក់ កាលពីវេលាម៉ោងប្រមាណ២រសៀលថ្ងៃទី២៤ កក្កដា នៅចំនុចផ្លូវដែក ផ្លូវចូលរោងចក្រទឹកកក ស្ថិតនៅភូមិរំដួលជើងភ្នំ សង្កាត់លេខ១ក្រុង-ខេត្តព្រះសីហនុ។
ក្រោយកើតហេតុរថភ្លើងមិនបានឈប់នោះទេ ពោលគឺបានបន្តបើកចូលទៅស្ថានីយនៅក្រុងព្រះសីហនុ បាត់ស្រមោល។ដោយឡែក ជនរងគ្រោះ បានបញ្ជូនទៅសង្គ្រោះនៅគ្លីនិកឯកជន។
សមត្ថកិច្ចមូលដ្ឋាន បានឲ្យដឹងថា រថយន្តត្រូវរថភ្លើងបុកនេះម៉ាក HONDA C R V ពណ៌ខ្មៅផ្លាក លេខ PP 2J 1560 ម្ចាស់រថយន្ត និងជាអ្នកបើកបរឈ្មោះ នួន ភាម ភេទប្រុសអាយុ៣៨ឆ្នាំ ជនជាតិខ្មែរ របួសស្រាល ។ចំណែក អ្នករួមដំណើរជាមួយឈ្មោះ ណង សារ៉ែន ភេទប្រុសអាយុ៤៤ ឆ្នាំខ្មែររបរ មេការគ្រឿងចក្រ (របួសបាក់ឆ្អឹងដងកាំបិតខាងស្តាំ នឹងថ្លោះក។អ្នកទាំងពីររស់នៅ ភូមិ៣សង្កាត់លេខ៤ ក្រុង-ខេត្តព្រះសីហនុ ។
សមត្ថកិច្ច បានឲ្យដឹងថា មុនពេលកើតហេតុគេឃើញរថយន្តCRV នេះបើកយឺតៗឆ្លងកាត់ផ្លូវដែកពេលនោះរថភ្លើងក៏បើកមកដល់ហើយបុកប៉ើងរថយន្តក្រឡាប់ជាច្រើនត្រឡប់បង្កឲ្យរងរបួសមនុស្សនិងខូចខាតរថយន្តធ្ងន់ធ្ងរ។សមត្ថកិច្ច បានដកស្រង់សម្តីប្រជាពលរដ្ឋនៅកន្លែងកើតហេតុបានឲ្យដឹងថា មុនពេលកើតមានគ្រោះថ្នាក់ចរាចរណ៍ នេះគេមិនបានលឺសម្លេងចុចស៊ីផ្លេររបស់រថភ្លើងនោះទេ ។ក្រោយកើតហេតុរថយន្តត្រូវក្រុមគ្រួសារស្ទូចយកទៅជុសជុលដោយខ្លួនឯង៕