ដីព្រៃហាមឃាត់របស់រដ្ឋ រាប់ពាន់ហិចតា ត្រូវបានគេកាប់ទន្ទ្រានយក ក្រោមចំណាត់ការមិនមានប្រសិទ្ធភាពមន្ដ្រីជំនាញ
).jpg)
កំពង់ធំ ៖ ដីព្រៃរាប់រយហិចតា នៅចំណុចខាងលិចឈាងខាងត្បូង ភូមិទំអរ ឃុំទំរីង ស្រុកសណ្ដាន់ ខេត្តកំពង់ធំ ត្រូវបានជនទុច្ចរិត បាន និងកំពុងកាប់ទន្ទ្រានរំលោភយករាប់ពាន់ហិតា ក្រោមចំណាត់ ការមិនមានប្រសិទ្ធភាពរបស់សមត្ថកិច្ចរដ្ឋបាលព្រៃឈើ។
នៅតំបន់ព្រៃនេះ ខាងក្រៅជាប់នឹងផ្លូវ មានស្លាកសរសេរ ថា ជាព្រៃជម្រកសត្វស្វា ប៉ុន្តែចូល ទៅខាងក្នុងប្រមាណ២០០ម៉ែត្រ សុទ្ធតែចំការដំណាំ វាលធំល្វឹងល្វើយរាប់រយហិចតា និងកន្លងមកថ្មីៗ នេះ កំពុងមានសកម្មភាព កាប់ទន្ទ្រានដីព្រៃនេះ ជាបន្ត។
អ្នកកំពុងកាប់ទន្ទ្រានព្រៃនេះ បានអះអាងថា ពួកគាត់ជាកម្មករ គេជួលមកឲ្យកាប់ តែប៉ុណ្ណោះគឺមានឈ្មោះ តុល ឡន និងឈ្មោះ សៀង ព្រីង មានប្រពន្ធឈ្មោះ ទុំ ចេក នៅភូមិឃុំទំរីងនេះ ជាអ្នកជួលគាត់។ ចំណែកអ្នកភូមិទំអរ បាននិយាយឲ្យដឹងថា ឈ្មោះ តុល ឡន ជាប្រធានសាខាអង្គការ បរិស្ថាន១ ប្រចាំខេត្តកំពង់ធំ និងមានទីតាំងនៅភូមិទំអរនេះ និងឈ្មោះ សៀង ព្រីង ជាឈ្មួញ កាប់ ទន្ទ្រានដីព្រៃនេះ យកទៅលក់ឲ្យគេ រាប់រយហិចតាហើយក្នុងពេលកន្លងមក ដោយមានការត្រូវរ៉ូវគ្នា ជាមួយសមត្ថកិច្ចរដ្ឋបាលព្រៃឈើ ដែលសមត្ថកិច្ចនៅទីនេះ បច្ចុប្បន្នឈ្មោះ សៀង ព្រីងនេះ នៅតែបន្ត កាប់រុករានដដែល ក្រោមការចំណាត់ការមិនមានប្រសិទ្ធភាពរបស់សមត្ថកិច្ចមេព្រៃ។
លោក តុល ឡន បានប្រាប់ឲ្យដឹងថា លោកមិនមានដីពិតប្រាកដនៅតំបន់នោះ ឡើយ គ្រាន់តែគេថា ឲ្យ ក្បាល១០ និងបណ្ដោយ៤០ម៉ែត្រ តែមិនដឹងដីនោះនៅចំណុចណានោះទេ ហើយ លោកក៏មិនបានរវល់អី នឹងដី ដែលគេថា ឲ្យ គ្រាន់តែខ្យល់នោះដែរ។
លោក ស៊ិន សៀង ឡាយ នាយរងរដ្ឋបាលព្រៃឈើ សង្កាត់ទំរីង បានប្រាប់អ្នកសារព័ត៌មាន ថា ចំណុចព្រៃនេះ ជាតំបន់ព្រៃឈើ ដាំស្ដារឡើងវិញ ស្ថិតនៅក្នុងដែនព្រៃអង់តែន ជាព្រៃហាមឃាត់ របស់រដ្ឋ។លោក បានបញ្ជាក់ថា ការកាប់ទន្ទ្រានដីព្រៃនេះ គឺលោកទទួលស្គាល់ ថា មានមែន ហើយឈ្មោះអ្នកកាប់ទន្ទ្រានដីព្រៃនេះខ្លះ ត្រូវបានសមត្ថកិច្ចរដ្ឋបាលព្រៃឈើ កសាង សុំណុំរឿងបញ្ជូនទៅតុលាការអស់ហើយ និងខ្លះទៀត កំពុងស្រាវជ្រាវធ្វើបន្ត ចំណែកសកម្មភាព កំពុងរុករាននោះ គឺលោក តិប ញាតា នាយខណ្ឌបានចុះទៅទីនោះ ដោយផ្ទាល់ៗ និងកំពុងមាន ចំណាត់ការក្ដៅគគុកទៀតផង ហើយនៅពេលដែលលោកនាយខណ្ឌ ឬសមត្ថកិច្ចចុះទៅ គឺពួកគេ រត់គេចខ្លួនអស់ហើយ បន្សល់តែស្លាកស្នាម តែប៉ុណ្ណោះ ។
លោកឡង គីសឹង អភិបាលស្រុកសណ្ដាន់ ដែលទើបមកកាន់ដំណែងថ្មីៗ ដែលគេយល់ថា មិនគ្រប់គ្រងភូមិសាស្ត្របានទាំងស្រុងនោះ បានអះអាងថា លោកទទួលស្គាល់មានការកាប់ទន្ទ្រាន ដីព្រៃនៅចំណុចនោះមែន ប៉ុន្តែលោកបានចំណាត់ការឲ្យនាយកសាលាស្រុកដឹកនាំ កំលាំងចុះទៅ ប៉ុន្មានដងហើយ ប៉ុន្តែនៅពេលចុះទៅ គឺគេដឹងខ្លួនមុន រត់គេចអស់។ លោក នឹងចុះទៅ ដោយផ្ទាល់ ដើម្បីបន្តចំណាត់ការរឿងនេះ ជាបន្ត។
ប្រជាពលរដ្ឋកំពុងតែរង់ចាំមើលចំណាត់ការ របស់លោកអភិបាលស្រុកសណ្ដាន់ លោក ឡង គឺសឹង ដែលមិនមានរឿង អាស្រូវ នឹងបទល្មើសព្រៃឈើ និងការទន្ទ្រានដីព្រៃហាមឃាត់របស់ រដ្ឋនេះ តើមានប្រសិទ្ធភាព និងតម្លាដែរឬទេ៕
![]()
![]()
![]()
![]()
![]()