សៀមរាប​៖​ ​ ជនបរទេស​ចំនួន​២​នាក់​ ដែលជា​ជនជាតិ​អង់គ្លេស​ បាន​លួចលាក់​ស្នាក់នៅ​ខុសច្បាប់​នៅក្នុង​ក្រុង​សៀមរាប ​ត្រូវ​បាន​កម្លាំង​ការិយាល័យ​នគរបាល​អន្តោប្រវេសន៍​ខេត្តសៀមរាប ​បានធ្វើការ​ចុះ​ត្រួតពិនិត្យ​រដ្ឋបាល ​រក​ឃើញ​​ ​​នៅក្នុង​ភូមិ​មណ្ឌល​៣ ​សង្កាត់​ ស្លក្រាម ក្រុង​-​ខេត្តសៀមរាប​ នា​ ថ្ងៃទី​២២ ខែ​កក្កដា ឆ្នាំ​២០១៦ ​ម្សិលមិញ​នេះ ​។

លោក​វរសេនីយ៍ទោ វ៉ាន់ រិ​ទ្ធ ប្រធានការិយាល័យ នគរបាល​អន្តោប្រវេសន៍​ បាន​ឲ្យ​ដឹងថា​ ​ជនបរទេស ​ដែល​សមត្ថកិច្ច​ឃាត់ខ្លួន​ មាន​៖១-​ឈ្មោះ GaVin  Martin Patrick christopher gavin ភេទ​ប្រុស អាយុ​៥៤​ឆ្នាំ​ ជនជាតិ​អង់គ្លេស​មុខរបរ​គ្មាន​កាន់​លិខិត​ឆ្លង​ដែល​លេខ​៥២០០០៥១៤៦​។ ២​ឈ្មោះ​ Pauline ann Mirgan​ភេទ​ស្រី​ជនជាតិ​អង់គ្លេស​មុខរបរ​គ្មាន ​កាន់​លិខិតឆ្លងដែន​លេខ​៧០៦០៦៣០៣៩​ ។

​​លោក​ បាន​បន្ដ​ថា​ នៅ​ចំពោះមុខ​សមត្ថកិច្ច​ ជន​បរទេស​ទាំង​ពីរ​រូប​នេះ ​​ ​បាន​សារភាព​​ថា រូបគាត់​ទាំង​០២​នាក់​ ជា​ប្តី​ប្រពន្ធ​ចូល​មក​ប្រទេស​កម្ពុជា ​តាម​ច្រក​អន្តរជាតិ​ប៉ោយប៉ែត ​ក្នុង​កំឡុង​ចុងឆ្នាំ​២០១៣​មូល​ហេតុ​ដែល​សមត្ថកិច្ច​ឃាត់ខ្លួន ​ដោយសារ​ពួកគាត់​ស្នាក់នៅ​ដោយ​ខុសច្បាប់ ​ហួស​ទិដ្ឋាការ​ម្យ៉ាងវិញទៀត ​ពួកគាត់ ​អត់​មាន​មុខរបរ ​និង​ប្រាក់​សំរាប់​បន្ត​ទិដ្ឋាការ​។

បច្ចុប្បន្ន​ជនបរទេស​ទាំង​០២​នាក់ ​ស្ថិតនៅក្នុង​ការសាកសួរ​របស់​កម្លាំង​ការិយាល័យ​នគរបាល​អន្តោប្រវេសន៍ ​នៃ​ស្នងការដ្ឋាន​នគរបាល​ខេត្តសៀមរាប ​ដើម្បី​កសាង​សំណុំរឿង​បញ្ជូន​ទៅកាន់​មណ្ឌល​ត្រៀម​ បណ្ដេញចេញ​(​ន​៧)​ ប្រចាំ​ព្រលាន​យន្តហោះ​អន្តរជាតិ​សៀមរាប ​របស់​អគ្គនាយក​ដ្ឋាន​ស៊ើបអង្កេត​នៃ​ការអនុវត្ត​នីតិវិធី​ ក្រសួងមហាផ្ទៃ​ចាត់ការ​តាម​នីតិវិធី​ច្បាប់​ជា​បន្ត​៕