កប៉ាល់ធុនយក្ស១គ្រឿង នាំភ្ញៀវបរទេសជាង២ពាន់នាក់ ចូលចតកំពង់ផែអន្ដរជាតិព្រះសីហនុ
ព្រះសីហនុ ៖ កប៉ាល់ធន់ធំមួយគ្រឿង បាននាំភ្ញៀវទេសចរបរទេសចម្រុះជាតិសាសន៍ ជាង២ពាន់នាក់ចូលចតនៅកំពង់ផែ អន្តរជាតិខេត្តព្រះសីហនុ នៅព្រឹកថ្ងៃទី២១ កក្កដា ឆ្នាំ ២០១៦នេះ ក្នុងដំណើរទស្សនកិច្ច រយៈពេលមួយថ្ងៃ នៅក្នុងទឹកដីខេត្តព្រះសីហនុ។
លោកវរសេនីយ៍ឯក ស៊ាង ឡេង ប្រធានប៉ុស្តិ៍នគរបាល ច្រកទ្វាកំពង់ផែអន្តរជាតិខេត្តព្រះសីហនុ បានអោយដឹងថា កប៉ាល់ ទេសចរបរទេសធន់ធំមួយគ្រឿងនេះមានឈ្មោះ DAWN PRINCESS សញ្ជាតិ BERMUDA មានបណ្តោយ ២៦១,៣១ម៉ែត្រ ទទឹង៣២,២៨ម៉ែត្រ ជម្រៅទឹក ៨,១០ម៉ែត្រ។លោក បានបន្ដថា នាវា មួយគ្រឿងនេះ បានដឹកភ្ញៀវទេសចរចម្រុះជាតិសាសន៍ជាង២,០០០ នាក់ក្នុងនោះ ស្រី ១០៩៨នាក់ មាន ២៦សញ្ជាតិផ្សេងគ្នានិងមាននាវិកសរុប ៨៤៧នាក់ ស្រី១១២នាក់ មាន២០សញ្ជាតិ ។ លោក បានឲ្យដឹងទៀតថា កប៉ាល់ DAWN PRINCESS បានធ្វើដំណើមកពីប្រទេសវៀតណាម ហើយបានចូលចតកំពង់ផែអន្តរជាតិខេត្តព្រះសីហនុ នៅវេលាម៉ោង ៦និង៣០នាទីព្រឹក ។តាមការគ្រោងទុកកប៉ាល់នេះនិងចាកចេញពីប្រទេសកម្ពុជាឆ្ពោះទៅកាន់ប្រទេសថៃ នៅវេលាម៉ោង ១៦,០០ល្ងាចថ្ងៃដដែល ។
លោកវរសេនីយ៍ឯក ស៊ាង ឡេង បានអោយដឹងទៀតថា ភ្ញៀវ ទេសចរ ដែលជិះនៅលើកប៉ាល់នេះមានសញ្ជាតិច្រើនជាងគេ មានជនជាតិអូស្ត្រាលី ១,៤៥៤នាក់ ញូសឺឡែន ២១០នាក់ អង់គ្លេស ១១៨នាក់ និងមានភ្ញៀវសញ្ជាតិផ្សេងទៀត ហើយភ្ញៀវដែលធ្វើដំណើរតាមនាវា DAWN PRINCESS ភាគច្រើនជាមនុស្សដែលមានវ័យចំណាស់ ។
លោក ប្រធានប៉ុស្តិ៍ បានឲ្យដឹងទៀតថា ការកើនឡើងភ្ញៀវទេសចរណ៍ ទាំងជាតិនិងអន្តរជាតិនៅក្នុងខេត្តព្រះសីហនុនេះដោយសារតែប្រទេសកម្ពុជា មានការអភិវឌ្ឍរីកចំរើន ពិសេសកម្ពុជាមានសន្តិសុខ សុវត្ថិភាពធានាក្នុងដំណើរកម្សាន្តរបស់ភ្ញៀវទេសចរជាតិ និងអន្តរជាតិមកលេងកម្សាន្តនៅព្រះរាជាណាចក្រកម្ពុជា ៕