កំពុងតែដាំខ្ទឹម នៅក្រោយផ្ទះ រន្ទះបាញ់ស្លាប់ម្នាក់ និងរងរបួសម្នាក់
សៀមរាប ៖ ប្រជាពលរដ្ឋម្នាក់ ត្រូវបានរន្ទះភ្លើងផ្តាច់ជីវិត នៅនឹងកន្លែងកើតហេតុ និងម្នាក់ទៀតរងរបួសស្រាល ខណះដែលរូបគាត់កំពុងដាំដំណាំ នៅខាងក្រោយផ្ទះ កាលពីវេលាម៉ោង១៧ និង២០នាទីល្ងាចថ្ងៃទី១៩ ខែកក្កដា ឆ្នាំ២០១៦ ស្ថិតក្នុងភូមិតាត្រាវ ឃុំកន្ត្រាំង ស្រុកប្រាសាទបាគង ខេត្តសៀមរាប។
នារសៀលថ្ងៃថ្ងៃទី២០ ខែកក្កដានេះ លោកវរសេនីយ៍ទោ មិន ចន្ថា អធិការនគរបាល ស្រុកប្រាសាទ បាគង បានឲ្យដឹងថា ករណីនេះ បានកើតឡើង ដោយសារតែគាត់បានទៅដាំខ្ទឹមនៅខាងក្រោយផ្ទះ របស់គាត់បណ្តាលឲ្យឈ្មោះ ពុំ ប្រិយ ភេទស្រីអាយុ៣៣ឆ្នាំ នៅភូមិតាត្រាវ (ស្លាប់) ២-ឈ្មោះ វន សារុំ ភេទស្រី អាយុ៣៥ឆ្នាំ នៅភូមិដូនទាវឃុំចាន់ស ស្រុកសូទ្រនិគមរបួសស្រាល នៅភូមិតាត្រាវ ឃុំកន្ត្រាំង។
លោក បន្តថា បន្ទាប់ពីកើតហេតុភ្លាមៗបងប្អូនពលរដ្ឋបានដឹកយកទៅមន្ទីរពេទ្យដើម្បីជួយសង្គោះ ប៉ុន្តែសពនោះត្រូវ បានស្លាប់បាត់ទៅហើយ។ បច្ចុប្បន្នសព នេះត្រូវបានសមត្ថកិច្ចប្រគល់ទៅឲ្យក្រុមគ្រួសារធ្វើបុណ្យតាមប្រពៃណី៕