ប្ដីសុំប្រពន្ធរួមរស់វិញ តែប្រពន្ធមិនព្រម ប្ដីខឹងទាញកាំបិតតាំងតោ ប្រហាររងរបួសធ្ងន់
).jpg)
កំពត៖ ប្ដី-ប្រពន្ធលែងលះគ្នាអស់រយៈជិតមួយឆ្នាំទៅហើយ បុរសជាប្ដីបានមកសុំប្រពន្ធរួមរស់វិញ តែប្រពន្ធមិនព្រម ប្ដីខឹងកាប់ប្រហារប្រពន្ធរងរបួសជាទម្ងន់ កាលពីវេលាម៉ោង៧ និង ៤០នាទីយប់ថ្ងៃទី១៩ ខែកក្កដា ឆ្នាំ២០១៦ ស្ថិតនៅក្នុងភូមិព្រៃត្នោត ឃុំកំពង់គ្រែង ស្រុកទឹកឈូ កំពត។
នគរបាលមូលដ្ឋាន បានឲ្យដឹងថា ប្តីជាជនបង្ករបួសស្នាមមានឈ្មោះ ឈឹម សិលា ភេទប្រុស អាយុ៣០ឆ្នាំ មុខរបរជាងប៉ះកង់រថយន្ត ស្ថិតនៅភូមិកើតហេតុខាងលើ ។ ប្រពន្ធ រងគ្រោះឈ្មោះ ធី សៀកឡេង អាយុ២០ឆ្នាំ មុខរបរមេផ្ទះ មានទីលំនៅភូមិកំពង់ដំរី ឃុំខ្សាច់កណ្តាល ស្រុកខ្សាច់កណ្តាល ខេត្តកណ្តាល។
តាមសំដីស្ត្រីចំណាស់ឈ្មោះ អ៊ិន សារួន អាយុ៧០ឆ្នាំ ជាម្តាយក្មេកស្ត្រីរងគ្រោះបានឲ្យដឹងថា កូនប្រុសគាត់ និងកូនប្រសារស្រីនេះ កន្លងមកបានឈ្លោះប្រកែកគ្នារួចបានបានលែងលះគ្នាក្រៅប្រព័ន្ធ តុលាការអស់រយៈពេល៥ខែមកហើយ គេទាំងពីរនាក់មានកូនប្រុសមួយអាយុ៣ឆ្នាំ។ ក្រោយពេលលែងលះគ្នាកូនប្រសារស្រីបានទៅរស់នៅឯស្រុកកំណើតជាមួយម្តាយរបស់ខ្លួននៅខេត្តកណ្តាល។
ចំណែកកូនម្តងយកទៅតាមខ្លួនម្តងយកមកឲ្យប្តី នៅមុនពេលកើតហេតុ កូនប្រសារស្រីបានមកលេង និងកូន នៅពេលមកលេងនិងកូននេះ នាង បានវេចបង្វេច ខោអាវមកជាមួយផង។
ប្រភព បន្តទៀតថា ក្រោយពីមកដល់ផ្ទះជួបប្តីជួបកូនហើយ កូនប្រុសគាត់ជាប្តីរបស់នាងកូនប្រសារបានអង្វរប្រពន្ធថា មកនៅផ្ទះវិញមក មាត់និយាយផង និងដើរមកយកបង្វេច ខោអាវរបស់ប្រពន្ធយកទៅទុកក្នុងផ្ទះ ស្រាប់តែនាងជាប្រពន្ធឆ្លើយថា អញមិនយកឯងវិញទេ បើអញយកប្តីទៀតអញយកប្រុសក្មេងវិញ និយាយហើយចូលទៅយកបង្វេចខោអាវរបស់ខ្លួនមកវិញ រួចនិយាយតបប្តីទៀតថា អញមិនដេកផ្ទះនេះ ជាមួយឯងទៀតទេ អញទៅដេកផ្ទះបងអញវិញឯងនៅដេកអោបកូនពីរនាក់ឪពុកនិងកូនចុះ។
និយាយឌឺដាក់គ្នាទៅវិញទៅមកកាន់តែធ្វើឲ្យប្តីមានចិត្តប្រច័ណ្ឌក៏ឈានទៅប្តីប្រើអំពើហិង្សា ដោយទាញកាំបិតតាំងតោថៃ កាប់ប្រពន្ធ ពីរបីកាំបិត បណ្តាលឲ្យរងរបួសជាច្រើនកន្លែង ត្រង់ថ្ពាល់ខាងស្តាំ និងក្បាលពីរកន្លែងព្រមទាំងកំភួនដៃស្តាំមួយកន្លែងហូរឈាមសន្លប់ក្នុងថ្លុកឈាមហើយត្រូវក្រុមគ្រួសារខាងប្តីដឹកទៅសង្គ្រោះនៅមន្ទីរពេទ្យបង្អែកខេត្ត។ ចំណែកប្តីក្រោយពីធ្វើសកម្មភាពរួចបានជិះរថយន្តរត់គេចខ្លួនបាត់ទៅ។
ក្រោយមកទើបកំលាំងសមត្ថកិច្ចនគរបាលប៉ុស្តិ៍ និងកំលាំងនគរបាលក្រុងសហការនិងកំលាំងរបស់ស្នងការខេត្តទៅដល់ពិនិត្យកន្លែងកើតហេតុ។
សមត្ថកិច្ច បានឲ្យដឹងថា ករណីនេះកើតឡើងពីការប្តីប្រច័ណ្ឌប្រពន្ធថាឈប់យកខ្លួន ទៅយកប្រុសក្មេងវិញទើបប្តីប្រច័ណ្ឌ ផ្ទុះកំហឹងរួចរត់គេចខ្លួនបាត់តែម្តង។ បច្ចុប្បន្នសមត្ថកិច្ចកំពុងស្រាវជ្រាវតាមរកចាប់ខ្លួនជនសង្ស័យដើម្បីផ្ដន្ទាទោស តាមច្បាប់៕
![]()
![]()
![]()
![]()
![]()