បង្ក្រាបក្រុមជួញដូរគ្រឿងញៀន ឃាត់ខ្លួន ជនសង្ស័យ៣នាក់ ដកហូតវត្ថុតាងមួយចំនួន
).jpg)
បន្ទាយមានជ័យ ៖ ជនសង្ស័យ៣នាក់ ត្រូវបានកម្លាំងអាវុធហត្ថក្រុងប៉ោយប៉ែត ធ្វើការបង្ក្រាប ពេលកំពុងជួញដូរគ្រឿងញៀន និងនាំគ្នាជក់ យ៉ាងសកម្ម កាលពីវេលាម៉ោង១ថ្ងៃត្រង់ ថ្ងៃទី១៨ ខែកក្កដា ឆ្នាំ២០១៦ នៅចំណុចភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកអនុសេនីយ៍ឯក រស់ សាហាន មេបញ្ជាការរងមូលដ្ឋានកងរាជអាវុធហត្ថក្រុង ប៉ោយប៉ែត បានឲ្យដឹងថា ក្នុងប្រតិបត្តិការនេះ កម្លាំងយើង ឃាត់ខ្លួនជនសង្ស័យ បានម្នាក់មានឈ្មោះ ចំរើន យូម៉ុង ភេទប្រុស អាយុ២៣ឆ្នាំរស់នៅក្នុងភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ដកហូតវត្ថុតាងថ្នាំប្រភេទមេតំហ្វេតាមីនម៉ាទឹកកក ចំនួន១កញ្ចប់តូចស្មើនិង០.៣៣ក្រាមនិងទូរស័ព្ទដៃ១គ្រឿង ក្រោយពីធ្វើការសាកសួររួច កម្លាំងអាវុធហត្ថក្រុងឈានដល់ការឃាត់ខ្លួនជនសង្ស័យបានចំនួន២នាក់ បន្ថែមទៀត ១.មានឈ្មោះ ស្ងួន បូរី ភេទប្រុស អាយុ៣០ឆ្នាំ ២.មានឈ្មោះ គី ប៊ុនធឿន ភេទប្រុស អាយុ៤០ឆ្នាំ រស់នៅក្នុងភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ និងដកហូតវត្ថុតាងមានថ្នាំប្រភេទមេតំហ្វេតាមីនម៉ាទឹកកកចំនួន៤កញ្ចប់តូចស្មើនឹង៣.៦៧ក្រាម និងទូរស័ព្ទដៃ៤គ្រឿងទៀត។
លោក បន្ដថា ក្រោយពីឃាត់ខ្លួនជនសង្ស័យទាំង៣នាក់ ត្រូវបានកម្លាំងអាវុធហត្ថក្រុងប៉ោយប៉ែតបញ្ជូនមកបញ្ជាការដ្ឋានកងរាជអាវុធហត្ថខេត្ត ដើម្បីសាកសួរបន្ត។ នៅមុខអាវុធហត្ថជនសង្ស័យទាំង៣នាក់បានឆ្លើយសារភាពថា ពួកគេទាំង៣នាក់ ពិតជាបានជួញដូរ និងប្រើប្រាស់គ្រឿងញៀនដូចការចោទប្រកាន់នេះពិតប្រាកដមែន។
ក្រោយពីបានចម្លើយសារភាពរបស់ជនសង្ស័យទាំង៣នាក់រួចហើយនោះ ត្រូវបានសមត្ថកិច្ចជំនាញកសាងសំណុំរឿងបញ្ជូនទៅតុលាការ ដើម្បីដាក់ទោសទៅតាមផ្លូវច្បាប់៕
![]()
![]()
![]()
![]()
![]()