ចាប់ចោរលួចម្នាក់ ដកហូតម៉ូតូមួយគ្រឿង ប្រគល់ជូនរងគ្រោះវិញ
បាត់ដំបង ៖ ជនសង្ស័យម្នាក់ ត្រូវបានកំលាំង អធិការដ្ឋាននគរបាលក្រុងបាត់ដំបង ធ្វើការឃាត់ខ្លួន ព្រមទាំង បានដកហូតនូវវត្ថុ តាង ម៉ូតូមួយគ្រឿងដែលជនសង្ស័យ លួចពីនារីរងគ្រោះ ។
លោក ប៉ាង ហៀង អធិការនគរបាលក្រុង បានបញ្ជាក់ថា កំលាំងបានទទួលនូវពាក្យបណ្តឹងមួយរបស់នារីរងគ្រោះឈ្មោះ រ៉ុត ធី អាយុ២៧ឆ្នាំ រស់នៅភូមិអូសទូក ឃុំ កំពង់ព្រៀង ស្រុកសង្កែ ដោយបាន មកស្នាក់នៅផ្ទះជួល ក្នុងភូមិចំការសំរោង២ សង្កាត់ ចំការសំរោង ក្រុងបាត់ដំបង ដោយបានបាត់ម៉ូតូមួយគ្រឿងម៉ាកឌ្រីម ធុនសេ១២៥ ស៊ែរីឆ្នាំ២០១៦ ពណ៌ ខ្មៅ ពាក់ស្លាកលេខ បាត់ដំបង 1V-9739. កាលពីវេលារំលង អាធ្រាត្រ ឈានចូលថ្ងៃទី៣០ ខែមិថុនា ឆ្នាំ២០១៦ ដោយកំលាំងជំនាញបានពិនិត្យ ឃើញថា ជនមិនស្គាល់មុខបានប្រើប្រាស់តួល វីសមួលដោះកញ្ចក់ទ្វារ ហើយបើកគន្លឹះ លួចយកម៉ូតូនេះទៅបាត់ ដោយជាប់ទៅជាមួយនូវអត្តសញ្ញាណប័ណ្ណមួយសន្លឹកទៅផង ។ លុះនៅវេលាម៉ោង២រសៀល ថ្ងៃ ខែដដែល កំលាំងជំនាញផ្នែកយុត្តិធម៌នៃអធិការដ្ឋាននគរបាលក្រុងបាត់ដំបង បានសហការជាមួយកំលាំងការិយាល័យជំនាញបង្ក្រាបបទល្មើសនៃស្នងការដ្ឋាននគរបាលខេត្ត ដោយបានធ្វើការស្រាវជ្រាវរហូតឈានដល់ការឃាត់ខ្លួនជនសង្ស័យក្នុងករណីអំពើលួចបានម្នាក់ ឈ្មោះ លី- ករុណា ភេទប្រុស អាយុ31ឆ្នាំ មានទីលំនៅមិនពិតប្រាកដក្នុងក្រុងបាត់ដំបង ក្នុងបទល្មើសជាក់ស្តែង ដែលគេបានយកមកសំងំលាក់នៅក្នុងភូមិទួលតាឯក សង្កាត់ទួលតាឯក ក្រុងបាត់ដំបង ដោយគេបានកាច់ស្លាកលេខម៉ូតូនោះចោលផង ។
ក្រោយពីការឃាត់ខ្លួន សមត្ថកិច្ច បានធ្វើការដកហូតនូវម៉ូតូមួយគ្រឿង ដែលភិនភាគគឺជារបស់ជនរងគ្រោះ ស្លាកលេខមួយ និងអត្តសញ្ញាណប័ណ្ណមួយសន្លឹកដែលជារបស់ នារីរងគ្រោះ ។
បច្ចុប្បន្ន ម៉ូតូជនរងគ្រោះបានប្រគល់ជូនទៅម្ចាស់ដើមវិញហើយ ។ ចំណែកជនសង្ស័យក៏ត្រូវបានកំលាំងជំនាញរៀបចំកសាងសំណុំរឿង ដើម្បី បញ្ជូនទៅស្នងការដ្ឋាននគរបាលខេត្ត ចាត់ការតាមផ្លូវច្បាប់ ៕