បញ្ជូនខ្លួន ខ្មាន់កាំភ្លើងបាញ់សម្លាប់លោក កែម ឡី ទៅតុលាការ អាចប្រឈមជាប់ពន្ធនាគារអស់មួយជីវិត
).jpg)
ភ្នំពេញ ៖ ខ្មាន់កាំភ្លើង ដែលបាញ់សម្លាប់លោកបណ្ឌិត កែម ឡី ប្រធានអង្គការអភិវឌ្ឍន៍សង្គម និងជាអ្នកវិភាគនយោបាយ ត្រូវបាន សមត្ថកិច្ចនៃស្នងការដ្ឋាននគរបាលរាជធានីភ្នំពេញ បញ្ជូនមកដល់អយ្យការអមសាលាដំបូងរាជធានីភ្នំពេញ នៅវេលាម៉ោង១៦ ថ្ងៃទី១១ ខែកក្កដា ឆ្នាំ២០១៦ នេះ ដើម្បីចាត់ការតាមច្បាប់ ។
សមត្ថកិច្ច បញ្ជាក់ថា ជនសង្ស័យត្រូវបានសន្និដ្ឋានចោទប្រកាន់ពីបទឃាតកម្មគិតទុកជាមុន តាមមាត្រា២០០នៃក្រមព្រហ្មទណ្ឌ ដែលអាចប្រឈមមុខនឹងការជាប់ពន្ធនាគារអស់មួយជីវិត ព្រោះករណីនេះជាការរៀបចំទុកជាមុន ។ ទោះបីយ៉ាងណា ការសម្រេចចោទប្រកាន់ផ្លូវការ ជាសមត្ថកិច្ចរបស់តុលាការ ។
សមត្ថកិច្ច បញ្ជាក់ថា ជនសង្ស័យមានឈ្មោះ ជួប សម្លាប់ អាយុ៣៨ឆ្នាំ មានស្រុកកំណើតនៅស្រុកស្វាយចេក ខេត្តបន្ទាយមានជ័យ ហើយបានទៅរស់នៅប្រកបរបរជាកម្មករចំការដំណាំនៅខេត្តស្រះកែវ ប្រទេសថៃ ។ ប៉ុន្តែសមត្ថកិច្ច មិនទាន់ជឿថា ជនសង្ស័យឈ្មោះ ជួប សម្លាប់ នោះទេ ។
ជនសង្ស័យត្រូវបានសមត្ថកិច្ចឃាត់ខ្លួនភ្លាមៗ ក្រោយពីបាញ់សម្លាប់លោកបណ្ឌិត កែម ឡី កាលពីវេលាម៉ោង៨៖ ៥០នាទី ព្រឹកថ្ងៃទី១០ខែកក្កដា ឆ្នាំ២០១៦ នៅចំណុចក្នុងទីតាំង ស្តារម៉ាត នៃស្ថានីយប្រេងឥន្ធនៈកាល់តិច បូកគោ ស្ថិតនៅកាច់ជ្រុងមហាវិថីព្រះមុនីវង្ស និង មហាវិថីម៉ៅសេទុង ក្នុងសង្កាត់ទន្លេបាសាក់ ខណ្ឌចំការមន ។
គួរបញ្ជាក់ថា ឃាតករដាក់ឈ្មោះខ្លួនឯងថា «ជួប សម្លាប់» ឈ្មោះ ពិត អឿត អាង ភេទប្រុស អាយុ៤៤ឆ្នាំ ទីលំនៅកំណើតភូមិទន្លេសរ ឃុំនគរភាស ស្រុកអង្គរជុំ ខេត្តសៀមរាប។ ម្តាយឈ្មោះ ឯម តាប់ និងឪពុកឈ្មោះ អឿត អាយុ៦៤ឆ្នាំ។
តាមការស្រាវជ្រាវបឋមរបស់សមត្ថកិច្ច បង្ហាញថា ប្រវត្តិរបស់ឈ្មោះ អឿត អាង នៅឆ្នាំ ២០១១ ឈ្មោះ អឿង អាង បានប្រពន្ធឈ្មោះ យ៉ាង យឿង នៅភូមិល្បើក ឃុំនគរភាស ស្រុកអង្គរជុំ មុខរបរ ទៅរកស៊ីនៅប្រទេសថៃ និងមានកូនស្រីម្នាក់។ នៅឆ្នាំ ២០១២ លែងលះជាមួយប្រពន្ធ។ នៅឆ្នាំ២០១៣ ចូលបួសជាព្រះសង្ឃ នៅវត្តប្រាសាទធ្នង់ (វត្តក្រឡាញ់) ឃុំតាសោម ស្រុកអង្គរជុំ ហើយនៅវត្តប្រាសាទធ្នង់បានប្រហែលជិត១ឆ្នាំ បានផ្លាស់ទៅនៅអាស្រម វត្តកំបោរ ស្ថិតនៅភូមិកំបោរ ឃុំស្វាយស ស្រុកវ៉ារិន។ នៅឆ្នាំ២០១៤ លោកសង្ឃអង្គនេះ បានផ្លាស់ទៅនៅ អាស្រមពើងតានាន់វិញម្តង ឃុំគោកដូង ស្រុកអង្គរជុំ។ នៅឆ្នាំ២០១៥ លោកសង្ឃមានបញ្ហាក្នុងអាស្រមពើងតានាន់ នោះ ក៏សឹក។ បន្ទាប់ពីសឹករួច ក៏ចូលធ្វើជាក្រុមអង្គការបរិស្ថាន ជាមួយឯកឧត្តម ទេព ពេជ្រ នៅក្រុងបាត់ដំបង បានឈរជើងធ្វើការនៅស្រុកអង្គរជុំ។
នៅថ្ងៃទី០៧ ឧសភា ឆ្នាំ២០១៦ ក៏បានប្រពន្ធថ្មីមួយទៀតឈ្មោះ ហឿម ហ៊ត់ នៅភូមិនគរភាស ស្រុកអង្គរជុំ មុខរបរ លក់ចាហួយក្នុងភូមិ។
នៅថ្ងៃទី ០១ កក្កដា ឆ្នាំ២០១៦ គាត់បានប្រាប់ប្រពន្ធថា ទៅធ្វើការនៅភ្នំពេញ រហូតមកដល់ថ្ងៃទី១០ កក្កដា ឆ្នាំ២០១៦ ក៏បានឃើញមានព័ត៌មានករណីឃាតកម្មបាញ់សម្លាប់លោក បណ្ឌិត កែម ឡី ហើយក៏បានឃើញរូបភាពជនសង្ស័យតាមបណ្តាញសង្គមហ្វេកប៊ុក និងបានពិនិត្យឃើញថា ជនសង្ស័យនៅក្នុងរូបភាពនោះ ពិតជាឈ្មោះ អឿត អាង រស់នៅមូលដ្ឋានស្រុកអង្គរជុំពិតប្រាកដមែន៕
![]()
![]()
![]()
![]()
![]()