ព្រៃឈើបានតួនាទីសំខាន់ណាស់ ក្នុងការជួយថែ រក្សា ដំណើរការប្រព័ន្ធអេកូឡូស៊ី
បន្ទាយមានជ័យ ៖ លោក អភិបាលរងខេត្តបន្ទាយមានជ័យ បានលើកឡើងថា ព្រៃឈើបានតួនាទីសំខាន់ណាស់ ក្នុងការជួយថែ រក្សា ដំណើរការប្រព័ន្ធអេកូឡូស៊ី តាមរយៈការជួយធ្វើនិយ័ត កម្ម អាកាសធាតុ ជួយកាត់បន្ថយឥទ្ធិពលអវិជ្ជមាន នៃការប្រែប្រួលអាកាសធាតុ ដូចជា ទឹកជំនន់ ខ្យល់ព្យុះ និងការស្រូបយកឧស្ម័នកាបូនិច ពីបរិយាកាស។
លោក លី សារី បានអះអាងទៀតថា ការបាត់បង់ព្រៃឈើ ពិតជានាំមកនៅគ្រោះមហន្តរាយ យ៉ាងធំធេងដល់ភពផែនដីយើង ដូចជា ខ្យល់ព្យុះ ខ្យល់កន្ត្រាក់ ទឹកជំនន់ រាំងស្ងួត ដូចដែល ខេត្តបន្ទាយមានជ័យ បានជួបជាញឹកញាប់។ ដូចនេះ ដើម្បីជំនួសមកវិញនៅព្រៃឈើ ដែលបានបាត់បង់ សំណូមពរដល់បងប្អូន និងក្មួយៗទាំងអស់ត្រូវរួមគ្នាដាំដើមឈើឡើងវិញតាមដីចំការ តាមព្រំ ដី តាមភ្លឺស្រែ ដើម្បីធ្វើអោយបរិស្ថានមានភាពប្រសើរឡើងវិញ។
លោក លី សារី អភិបាលរងខេត្តបន្ទាយមានជ័យ តំណាងអោយលោក សួន បវរ អភិបាលរងខេត្តបន្ទាយមានជ័យ ថ្លែងក្នុងទិវារុក្ខាទិវា៩ កក្កដា ឆ្នាំ២០១៦នេះ នៅក្នុងវីរអន្តរាគមន៍៥១៣ ស្ថិតនៅភូមិថ្មសិនសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ដោយមានការចូលរួម ពីសំណាក់លោក អ៊ី ឡុងតំណាងប្រធានក្រុមប្រឹក្សាខេត្ត និងប្រជាពលរដ្ឋ សិស្ស លោកគ្រូអ្នកគ្រូ និងយោធា ៥១៣ រាប់រយនាក់។
ក្នុងឱកាសនោះដែរ លោក ជា ផល្លី នាយខណ្ឌរដ្ឋបាលព្រៃឈើបន្ទាយមានជ័យ បានលើកឡើង ពីប្រវត្តិនៃពិធី បុណ្យរុក្ខទិវា ជាទិវាបុណ្យជាតិដែលបង្កើតឡើងដោយស្នាគ្រហស្ថរបស់ព្រះករុណា ព្រះបាទសម្តេចព្រះបរមរតនកោដិ នរោត្តម សីហនុ នាសម័យសង្គមរាស្ត្រនិយម និងកំណត់ដោយព្រះរាជក្រឹត្យ ចុះថ្ងៃទី៨១៩៥២ ហើយទិវានេះផងដែរ តែងប្រារឰធ្វើជារៀងរាលឆ្នាំ។
លោកនាយខណ្ឌរដ្ឋបាល ព្រៃឈើ បានបន្ថែមទៀតថា កូនឈើប្រណិតចំនួន៣៥០០ដើម ត្រូវបានខណ្ឌរដ្ឋបាលព្រៃឈើបន្ទាយមានជ័យ លើផ្ទៃដីជាង២ហិកតា និងកូនឈើគ្រញូង បេង ធ្នង់ ប្រេងខ្យល់ កូនឈើហូបផ្លែចំនួន៧០០០ដើម ទៀតសម្រាប់ចែកជូនប្រជាពលរដ្ឋយកទៅដាំ។
តាមរយះសកម្មភាពនេះ វាពិតជាបានឆ្លុះបញ្ចាំងពីចូលរួមយ៉ាងយកចិត្តទុកដាក់ពីថ្នាក់ដឹកនាំ មន្ត្រីរាជការ កងកំលាំងប្រដាប់អាវុធ ប្រជាពលរដ្ឋ សិស្សានុសិស្ស លោកគ្រូអ្នកគ្រូក្នុងការស្តារព្រៃឈើ ឡើងវិញដោយចូលរួមដាំដើមឈើឡើងវិញ៕