ភ្នំពេញ៖ ​ ​ពលករ -ពលការិនីខ្មែរ៤នាក់ ​ដែលជួបការលំបាកពេល​ទៅធ្វើការនៅប្រទេសម៉ាឡេស៊ី នឹង​មកដល់កម្ពុជាវិញ នៅព្រឹកថ្ងៃទី២៥ ខែមិថុនា ឆ្នាំ២០១៦​ ស្អែកនេះ តាមជើងយន្តហោះ AK ៥៣៦។ នេះបើតាម អ្នកនាំពាក្យ​ក្រសួង​ការបទេស​ ​លោក ជុំ សុន្ទរី បាន​ឲ្យ​ដឹង​ នៅរសៀលថ្ងៃទី២៤ ខែមិថុនានេះ។

​លោក ជុំ សុន្ទរី បានបន្ដថា​ ពលករ-ពលការិនីខ្មែរទាំង៤​​នាក់​  ត្រូវបាន​ ស្ថាន​ឯកអគ្គរាជទូតកម្ពុជា​ ប្រចាំប្រទេសម៉ាឡេស៊ី​ ​ ​ ​ជួយសង្រ្គោះ ​មានឈ្មោះ​ ៖

១- ពលការិនី ស៊ីវ សារឿន អាយុ៣៤ ឆ្នាំ នៅភូមិមេមត់ ឃុំមេមត់ ស្រុកមេមត់ ខេត្តត្បូងឃ្មុំ បានទៅធ្វើការតាមផ្ទះនៅម៉ាឡេស៊ី តាំងពីខែកុម្ភៈ ឆ្នាំ២០១៥ តាមរយៈមេខ្យល់ ដោយធ្វើដំណើរតាម រថយន្តកាត់តាមប្រទេសថៃ។ ដោយសាមីខ្លួនពុំមានលទ្ធភាពដោះស្រាយ ដោយខ្លួនឯង ស្ថានទូតបាន ចេញថ្លៃបង់ពិន័យឲ្យរដ្ឋាភិបាលម៉ាឡេស៊ី ព្រមទាំងទិញសំបុត្រយន្តហោះឲ្យពលការិនីរូបនេះ។
២- ពលការិនី គ្រួច ស្រីពៅ អាយុ២៤ឆ្នាំ នៅភូមិបល្ល័ង្គខាងលិច ឃុំលេខ១ ស្រុកទីរួម ខេត្តកំពង់ធំ ខេត្តកំពង់ធំ បានទៅធ្វើការនៅប្រទេសម៉ាឡេស៊ី ខាងផ្នែកជូតសំអាត តាំងពីថ្ងៃទី១៩ ខែឧសភា ឆ្នាំ ២០១៦ តាមរយៈក្រុមហ៊ុន Century Cambodian នៅកម្ពុជា ដោយធ្វើដំណើរតាម រថយន្តកាត់តាមប្រទេសថៃ។
៣- ពលករ សាលីម អាទៀតម៉ីស៊ី អាយុ២៨ឆ្នាំ នៅភូមិ២ សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ បានទៅធ្វើការនៅប្រទេសម៉ាឡេស៊ី ជាចុងភៅ ដោយខ្លួនឯង តាំងពីថ្ងៃទី១២ ខែមករា ឆ្នាំ ២០១៦។
៤- ពលករ រ៉សាត រ៉ហ្វាត អាយុ១៩ឆ្នាំ នៅភូមិថ្មី ឃុំពពេល ស្រុកពញាក្រែក ខេត្តត្បូងឃ្មុំ បានទៅធ្វើការក្នុងចំការដូងប្រេង នៅប្រទេសម៉ាឡេស៊ី តាំងពីថ្ងៃទី ២០ ខែតុលា ឆ្នាំ២០១៥ តាម រយៈមេខ្យល់ ដោយធ្វើដំណើរតាមរថយន្តកាត់តាមប្រទេសថៃ។

អ្នកនាំពាក្យ​ក្រសួង​ការបទេស​ រូបនេះ បានបញ្ជាក់​ទៀត​ថា  ក្នុងកំឡុងពេលរង់​ចាំការវិល​ត្រឡប់​មកកម្ពុជាវិញ ​ស្ថានទូតបានផ្ដល់កន្លែងស្នាក់​នៅ និងការទទួលទានផ្សេងៗ ដល់ពលករ-ពលការិនី ទាំង០៤នាក់ផងដែរ។ ពលករ-ពលការិនីខ្មែរ​ ទាំង០៤នាក់​ នឹងមក​ដល់​អាកាស​យាន​ដ្ឋាន​អន្ដរជាតិ​​ភ្នំពេញ  នៅថ្ងៃទី​២៥ ខែមិថុនាឆ្នាំ ២០១៦នេះ នៅវេលាម៉ោង ៧ និង​៣៥ នាទី​ព្រឹក​ តាមជើង​យន្ដហោះ AK ៥៣៦ ៕