ជនជាតិឡាវម្នាក់ រួមនឹងថ្នាំញៀនជិត២គីឡូក្រាម បញ្ជូនខ្លួនមកកាន់តុលាការ
ព្រះវិហារ ៖ សមត្ថកិច្ចខេត្តព្រះវិហារ បានកសាងសំណុំរឿងបញ្ជូនខ្លួន ជនជាតិឡាវម្នាក់ រួមនឹងវត្ថុ តាង គ្រឿងញៀនជិត២គីឡូក្រាម ទៅសាលាដំបូងខេត្ត នៅរសៀលថ្ងៃទី២១ មិថុនា ឆ្នាំ ២០១៦នេះដើម្បីចាត់ការទៅតាមនីតិវិធីនៃច្បាប់។
ការបង្ក្រាប បទល្មើសគ្រឿងញៀននេះ បានប្រព្រឹត្តទៅកាលពីវេលាម៉ោង១០និង៣០នាទីព្រឹកថ្ងៃទី២០ មិថុនា ២០១៦ ស្ថិតនៅចំណុចមុខវត្តកំពង់ស្រទ្បៅ ភូមិកំពង់ស្រទ្បៅ ឃុំកំពង់ស្រទ្បៅ១ ស្រុកឆែប ខេត្តព្រះវិហារ ដោយ កម្លាំងនគរបាលអគ្គស្នងការដ្ឋាននគរបាលជាតិ សហការជាមួយកម្លាំងនគរបាលការិយាល័យកណ្តាលប្រឆាំងបទល្មើសនៃស្នងការដ្ឋាននគរបាលខេត្តព្រះវិហារ បានចុះប្រតិបត្តិការឃាត់ខ្លួនបុរសជនជាតិទ្បាវម្នាក់ កំពុងធ្វើសកម្មភាពជាក់ស្ដែងជួញដូរគ្រឿងញៀនទ្រង់ទ្រាយធំឆ្លងដែនចូលទឹកដីកម្ពុជា។
សេចក្ដីរាយការណ៍ អោយដឹងថា ជនសង្ស័យមានបក្ខពួក ម្នាក់ទៀត ពេលឃើញសមត្ថកិច្ច បានលោតចុះពីលើកាណូត ហើយហែលទឹកត្រទ្បប់ ចូលទៅកាន់ទឹកដីទ្បាវវិញ ប៉ុន្តែអាជ្ញាធរខ្មែរអះអាងថា ខាងសមត្ថកិច្ចទ្បាវ តាមចាប់ខ្លួនជនសង្ស័យម្នាក់នោះបានវិញហើយ។
ជនសង្ស័យដែលត្រូវឃាត់ខ្លួន ឈ្មោះ ប៊ុន ម៉ូន ភេទប្រុសអាយុ៥២ឆ្នាំជនជាតិទ្បាវ មានទីលំនៅស្រុកមឿងស៊ីងខេត្តណាំថា ប្រទេសទ្បាវ ក្នុងនោះ សមត្ថកិច្ចខាងកម្ពុជាដកហូតបានគ្រឿងញៀនប្រភេទមេតំហ្វេតាមីនម្ស៉ៅក្រាមសឬម៉ាទឹកកកចំនួន២កញ្ចប់ធំទម្ងន់សរុប១,៩១៨គីទ្បូក្រាម និងប៉ាស្ព័រ ចំនួន១ក្បាល។ នៅព្រឹកថ្ងៃទី២១មិថុនា២០១៦ សមត្ថកិច្ចកំពុងបន្តស៊ើបសួរជនសង្ស័យ នៅក្នុងស្នងការដ្ឋាននគរបាលខេត្ត ដើម្បីកសាងសំណុំរឿងបញ្ជូនទៅកាន់សាលាដំបូងខេត្ត ដើម្បីចាត់ការទៅតាមផ្លូវច្បាប់។
គួរបញ្ជាក់ថា តាមច្រកទ្វារព្រំដែនទឹកកម្ពុជា-ទ្បាវ បច្ចុប្បន្ននេះ កំពុងល្បីល្បាញខ្លាំងណាស់ថាមានឈ្មួញខ្មែរ មានអំណាចមួយចំនួនកំពុងរកស៊ីជួញដូរគ្រឿងញៀនទ្រង់ទ្រាយធំ ជាមួយជនជាតិទ្បាវជាហូរហែ៕
![]()
![]()
![]()
![]()
![]()