ឃាត់ខ្លួនជនសង្ស័យប្រុស-ស្រី ២នាក់ ពីបទ រំលោភលើទំនុកចិត្ត
បាត់ដំបង ៖ សមត្ថកិច្ចក្រុងបាត់ដំបង ឃាត់ខ្លួន ជនសង្ស័យស្រី/ប្រុស ២ នាក់ យោងតាមពាក្យបណ្ដឹងរបស់ជនរងគ្រោះ ចោទប្រកាន់ពីបទ រំលោភលើទំនុកចិត្ត កាលពីវេលាម៉ោង៧យប់ ថ្ងៃទី១៤ ខែមិថុនា ឆ្នាំ២០១៦ ។
យោង តាមពាក្យបណ្តឹងរបស់ជនរងគ្រោះឈ្មោះ យ៉ាន់ សុវិសាល ភេទប្រុស អាយុ២២ឆ្នាំរស់នៅភូមិកំពង់ក្របី សង្កាត់ស្វាយប៉ោ ក្រុងបាត់ដំបង បានអះអាងថា កាលពីថ្ងៃទី១៤ ឈ្មោះ យឹម សាវន្ដ ភេទប្រុស អាយុ២៤ឆ្នាំ រស់នៅភូមិរំចេក៤ សង្កាត់រតនៈ ក្រុងបាត់ដំបង និងនារីម្នាក់ឈ្មោះ សា ហន្ទី អាយុ២០ឆ្នាំ រស់នៅ ផ្ទះជួល ក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ដែលមានមុខរបរជានារីម៉ាស្សា យីហា ហេងហេង ស្ថិតនៅក្រុម២១ ភូមិ២០ឧសភា សង្កាត់ស្វាយប៉ោ ក្រុងបាត់ដំបង បានខ្ចីម៉ូតូរបស់ខ្លួនម៉ាក YAMAHA. ( FZ ) ពណ៌ខ្មៅគ្មានស្លាកលេខថា ទៅទិញបាយនិងម្ហូប ហើយមិនឃើញយកម៉ូតូមកឲ្យខ្លួនវិញទេ ដោយជិះម៉ូតូគេចបាត់រហូតទៅ។
ដំបូង ដោយអាងថា ជាមនុស្សស្គាល់គ្នាទើបខ្លួនចេះតែរង់ចាំ ប៉ុន្តែបែរជាគេមិនវិលត្រឡប់មកវិញទាល់តែសោះ ទើបធ្វើឲ្យខ្លួនសម្រេចចិត្តចូលទៅដាក់ពាក្យប្តឹង នៅអធិការដ្ឋានតែម្តងពីបទ រំលោភលើទំនុកចិត្ត ដើម្បីឲ្យសមត្ថកិច្ចជួយចាត់វិធានការតាមផ្លូវច្បាប់។
ក្រោយពី បានទទួលនូវពាក្យបណ្តឹងរួចមក កម្លាំងជំនាញនៃអធិការដ្ឋាននគរបាលក្រុងបាត់ដំបង បានចុះធ្វើការស្រាវជ្រាវរហូតដល់ថ្ងៃទី១៥ ខែមិថុនា ឆ្នាំ២០១៦ វេលាម៉ោង៣ និង៤០នាទី រសៀល កម្លាំងបានរកឃើញមុខសញ្ញា ដែលគេទាំងពីរនាក់កំពុងសម្ងំលាក់ខ្លួននៅត្រង់ចំណុច ភូមិសំរោងអូទ្រា ឃុំសំរោងក្នុង ស្រុកឯកភ្នំ ខេត្តបាត់ដំបង ទើបឈានដល់ការឃាត់ខ្លួនតែម្តង ដើម្បីយកមកសាកសួរ។
បច្ចុប្បន្ន ជនសង្ស័យទាំង២នាក់ ត្រូវបានកម្លាំងជំនាញកំពុងកសាងសំណុំរឿង ដើម្បីបញ្ជូនទៅកាន់ការិយាល័យជំនាញនៃស្នងការដ្ឋាននគរបាលខេត្តហើយ ៕
![]()
![]()
![]()
![]()
![]()